Maktab oshxonasi xodimlari qanday tibbiy-gigiyenik talablarga amal qilishi lozim? SSV ma’lumot berdi

Sog‘liqni saqlash vazirligi “Umumiy o‘rta, o‘rta maxsus, professional ta’lim muassasalarida o‘quvchilar ovqatlanishini tashkil etishning sanitariya qoidalari, normalari va gigiyena normativlari”ga ko‘ra ta’lim muassasalari ovqatlanish oshxonalari xodimlari tomonidan shaxsiy gigiyena qoidalariga rioya etish, profilaktik tibbiy ko‘rikdan o‘tish va kasbiy gigiyenik tayyorgarlikka qo‘yiladigan talablar haqida ma’lumot berdi.

Qayd etilishicha, ta’lim muassasalarida o‘quvchilar o‘rtasida yuqumli kasalliklarning kelib chiqishi va tarqalishining oldini olish maqsadida xodimlar tomonidan shaxsiy gigiyena qoidalariga rioya qilinishi uchun oshxonada sharoitlar yaratilishi kerak. Xususan,

• Qo‘l yuvish uchun barcha ishlab chiqarish sexlarida issiq va sovuq suvlar o‘tkazilishi, ularni aralashtirish moslamasi bo‘lgan chanoqlari o‘rnatilishi zarur.
• Alohida sovun va shaxsiy yoki bir martalik sochiqlarni qo‘yadigan joy bo‘lishi lozim. Ishlab chiqarish vannalarida qo‘llarni yuvish mumkin emas.
• Ovqatlanish oshxonalarida xodimlar uchun mo‘ljallangan maxsus ish kiyimlarini markazlashgan holda yuvishni tashkil qilish kerak.
• Shamollash yoki oshqozon-ichak kasalliklari bezovta qilganda, o‘z oilasida ichak infeksiyalari bilan xastalanish qayd etilgan barcha holatlarda, shuningdek, yiringli yaralar, kesilishlar, kuyishlar haqida ishchi ma’muriyatni ogohlantirishi kerak va tibbiy yordam uchun murojaat qilishi lozim.
• Ichak infeksiyalari, terining yiringlashi, yuqori nafas yo‘llarining yallig‘lanish kasalliklari bo‘lsa, biror joyi kuygan yoki kesilgan bo‘lsa, vaqtincha ishga qo‘yilmaydi. Faqat tuzalganidan so‘ng, tibbiy ko‘rik va shifokor xulosasiga qarab ishlashiga ruxsat beriladi.
• Oshxona birinchi tibbiy yordam ko‘rsatish uchun aptechka bilan ta’minlanishi zarur.