Sirdaryo viloyati Oqoltin tumanida qarzdor otaga nisbatan ma’muriy qamoq jazosi tayinlandi. Bu haqda Majburiy ijro byurosi xabar berdi.
Qayd etilishicha, Fuqarolik ishlari bo‘yicha Oqoltin tumanlararo sudining 2022-yil 23-fevraldagi ijro varaqasiga asosan qarzdor S.R.dan undiruvchi T.N.ning foydasiga ikki nafar voyaga yetmagan farzandining moddiy ta’minoti uchun ish haqi va boshqa daromadlarining 1/3 qismi miqdorida aliment undirish to‘g‘risidagi ijro hujjati bo‘lim ish yurituviga kelib tushgan.
Ijro harakatlari davomida qarzdor S.R.ning 2022-yil fevral oyidan 2022-yil avgust oyiga qadar 4 290 208 so‘m aliment pullarini to‘lamagani sababli to‘plangan hujjatlar Jinoyat ishlari bo‘yicha Xovos tumani sudiga yuborilgan va sudning shu kungi qaroriga asosan 15 sutka ma’muriy qamoq jazosi tayinlangan.
Izoh (0)