“Hididan odamning ko‘ngli ayniydi, 2 yildan beri ahvol shu”. Jizzaxda ko‘p qavatli uylarning kanalizatsiyasi zovurga chiqarilayotgani aniqlandi

Jizzax viloyati Sharof Rashidov tumanida yangi qurilgan ko‘p qavatli uylarning kanalizatsiyasi zovurga chiqarilayotgani, aholi bundan norozi ekani haqida Telegram’dagi “Ekologuz” kanalida xabar e’lon qilindi.

Qayd etilishicha, murojaat Sharof Rashidov tumani “Qo‘shbarmoq” MFYda istiqomat qilayotgan aholidan kelib tushgan. Yangi qurilgan ko‘p qavatli uylarning kanalizatsiyasini tadbirkorlar “chuqur zapravka” deb ataluvchi yonilg‘i qo‘yish shoxobchasi yonidagi zovurga chiqarib qo‘ygani aytilgan. Murojaatchi quyidagicha yozadi:

Uning sassiq hididan nafas olib, yashab bo‘lmayapti. Derazalarni ochmay o‘tiramiz. Kechki salqinda biroz hovlida o‘tiraylik desak, sassiq hiddan odamning ko‘ngli ayniydi. 2 yildan beri ahvol shu. Afsuski, na tuman hokimiyati, na shahar hokimiyati arz-dodimizni eshitmayapti.

“Inson qadrini ulug‘lash va faol mahalla yili”da inson umuman qadrlanmayapti. Balki Jizzax Ekologiya boshqarmasi bizga yordam berar? Chunki zovurda yashayotgan mayda jonivorlar ham zaharli kanalizatsiya suvlaridan qirilib bo‘ldi.

Mutasaddilardan munosabat kutib qolamiz. Zora shahar va tuman hokimliklari e’tiboridan chetda qolayotgan muammo Jizzax viloyati hokimiyati va viloyat Ekologiya boshqarmasi tomonidan hal etilib, odamlar toza havodan nafas olib qolishsa?!

Unga ko‘ra, fuqarolarning murojaati bo‘yicha boshqarma nazorat inspeksiyasi, Suv-yer resurslari va yerosti resurslarini muhofaza qilish bo‘limi hamda Sharof Rashidov tumani bo‘limi xodimlari tomonidan dastlabki o‘rganish ishlari boshlangan. O‘rganish natijalari bo‘yicha qo‘shimcha ma’lumot taqdim etiladi.