Toshkent viloyati Zangiota tumani hokimligi xodimi 18 ming dollar pora olayotganida ushlandi. Bu haqda O‘zA xabar berdi.
Ma’lum qilinishicha, u pullarni ikki nafar fuqaroni Qirg‘izistondagi oliy o‘quv yurtida o‘qishlari haqida soxta hujjatlar tayyorlab, so‘ngra ularning o‘qishlarini Toshkentdagi oliygohlardan birining 2-bosqichiga ko‘chirib berish evaziga olgan vaqtida ushlangan.
Shuningdek, xorijiy davlatlardagi OTMlarga o‘qishga kirishga ko‘maklashish bilan shug‘ullanuvchi, Toshkent shahridagi MCHJ rahbari Qozog‘iston fuqarosi bilan kelishgan holda ikki nafar fuqaroning ishonchiga kirib, ularning Qozog‘istondagi oliygohlardan birining 1-bosqichini tamomlagani haqidagi hujjatni tayyorlab berish evaziga har biridan 15 million so‘mdan talab qilgan.
U MCHJ hisob raqamiga umumiy 9 million so‘m, Qozog‘iston fuqarosi nomiga 1900 dollar o‘tkazilgani to‘g‘risida 4 dona kvitansiyalarni qabul qilib olgan vaqtida, DXXning Toshkent shahar bo‘yicha boshqarmasi va IJQK departamentining shahar boshqarmasi xodimlari tomonidan ushlangan.
Shuningdek, DXX xodimlari tomonidan Bosh prokuratura huzuridagi departamentning Toshkent shahar boshqarmasi bilan hamkorlikda o‘tkazilgan yana bir tezkor tadbirda poytaxtdagi nufuzli oliygohlardan birining 3-bosqich talabasi ikki nafar fuqarodan 2 ming dollar olgan vaqtda ushlangan.
Ma’lum bo‘lishicha, u Qozog‘istondagi oliygohlardan birining 2-bosqichini tamomlagani haqida soxta hujjat olib berib, mazkur hujjat orqali Toshkent shahridagi xususiy universitetning 2-bosqichiga o‘qishga kiritib qo‘yishini va’da qilgan.
Hozirda mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda.
Izoh (0)