Зангиота тумани ҳокимлиги ходими 18 минг доллар пора билан қўлга тушди

Тошкент вилояти Зангиота тумани ҳокимлиги ходими 18 минг доллар пора олаётганида ушланди. Бу ҳақда ЎзА хабар берди.

Маълум қилинишича, у пулларни икки нафар фуқарони Қирғизистондаги олий ўқув юртида ўқишлари ҳақида сохта ҳужжатлар тайёрлаб, сўнгра уларнинг ўқишларини Тошкентдаги олийгоҳлардан бирининг 2-босқичига кўчириб бериш эвазига олган вақтида ушланган.

Шунингдек, хорижий давлатлардаги ОТМларга ўқишга киришга кўмаклашиш билан шуғулланувчи, Тошкент шаҳридаги МЧЖ раҳбари Қозоғистон фуқароси билан келишган ҳолда икки нафар фуқаронинг ишончига кириб, уларнинг Қозоғистондаги олийгоҳлардан бирининг 1-босқичини тамомлагани ҳақидаги ҳужжатни тайёрлаб бериш эвазига ҳар биридан 15 миллион сўмдан талаб қилган.

У МЧЖ ҳисоб рақамига умумий 9 миллион сўм, Қозоғистон фуқароси номига 1900 доллар ўтказилгани тўғрисида 4 дона квитанцияларни қабул қилиб олган вақтида, ДХХнинг Тошкент шаҳар бўйича бошқармаси ва ИЖҚК департаментининг шаҳар бошқармаси ходимлари томонидан ушланган.

Шунингдек, ДХХ ходимлари томонидан Бош прокуратура ҳузуридаги департаментнинг Тошкент шаҳар бошқармаси билан ҳамкорликда ўтказилган яна бир тезкор тадбирда пойтахтдаги нуфузли олийгоҳлардан бирининг 3-босқич талабаси икки нафар фуқародан 2 минг доллар олган вақтда ушланган.

Маълум бўлишича, у Қозоғистондаги олийгоҳлардан бирининг 2-босқичини тамомлагани ҳақида сохта ҳужжат олиб бериб, мазкур ҳужжат орқали Тошкент шаҳридаги хусусий университетнинг 2-босқичига ўқишга киритиб қўйишини ваъда қилган.

Ҳозирда мазкур ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.