Xitoy sanoat va axborotlashtirish vazirligi e’lon qilgan ma’lumotlarga ko‘ra, Xitoyda mobil telefon ishlab chiqarish 2022-yilning birinchi yetti oyida qisqargan. Bu haqda Sinxua xabar bermoqda.
Agentlik ma’lumotlariga ko‘ra, joriy yilning yanvaridan iyuligacha bo‘lgan davrda mamlakatda 863 million dona mobil telefon ishlab chiqarilgan, bu o‘tgan yilning shu davriga nisbatan 3,6 foizga kam.
Bu davrda qariyb 665 million dona smartfon ishlab chiqarilgan, bu o‘tgan yilga nisbatan 2,9 foizga kamdir.
Bojxona ma’lumotlariga ko‘ra, Xitoyning uyali telefon eksporti o‘tgan yilning shu davriga nisbatan 11,5 foizga kamayib, dastlabki yetti oyda 470 million donani tashkil etdi.
Buning O‘zbekistonga ta’siri
Fevral oyi oxirida Ukrainada boshlangan urush va Rossiyaga qo‘llangan sanksiyalar jahon iqtisodiyotiga jiddiy zarba berdi. Bu Markaziy Osiyo mamlakatlari, shuningdek, O‘zbekistonga ham ta’sir ko‘rsatmoqda.
Shu jumladan, mamlakatning telefon importi ham urush natijasida bir qator o‘zgarishlarga duch keldi.
Yanvar oyida Xitoydan mamlakatga qariyb 87 mingta telefon olib kelingan bo‘lsa, fevralda sezilarli darajada o‘sish kuzatilgan (221 ming). Bu ko‘rsatkich keyingi oylarda ham oshib borib, mart oyida 224 mingtaga yetgan.
Lekin aprel oyidan boshlab import hajmi pasayib borganini kuzatish mumkin (207 ming), may oyida esa bu ko‘rsatkich keskin pastlagan (104,9 ming). O‘tgan iyul oyida esa Xitoydan 100 ming dona atrofida telefon olin kelingan.
Bugungi kunda O‘zbekiston 7 oy mobaynida mobil telefonlarni eng ko‘p import qilgan davlat Xitoyligicha qolmoqda. Shu davrgacha u yerdan 1,1 million dona gadjet keltirilgan.
Izoh (0)