Бош прокуратурадан Қорақалпоғистон воқеалари юзасидан баъзи фуқароларнинг қамоқ эҳтиёт чорасини енгилроғига алмаштириш сўралганди. Олий Мажлиснинг Инсон ҳуқуқлари бўйича вакили (омбудсман) матбуот хизмати гумонланувчиларнинг 24 нафари жамоат кафиллиги асосида ўз оиласига қайтарилганини маълум қилди.
Қайд этилишича, Бош прокуратура томонидан Қорақалпоғистонда бўлиб ўтган воқеаларни мустақил равишда ўрганаётган Комиссия аъзолари таклифи ва Жўқорғи Кенгеси илтимосномасига кўра, 24 нафар гумонланувчини жамоат кафиллиги асосида ўз оиласига қайтарилди. Уларга нисбатан белгиланган қамоқ эҳтиёт чораси инсонпарварлик тамойили асосида жамоатчилик назорати ва уй қамоғи тарзидаги эҳтиёт чорасига алмаштирилди.
Бунда ушбу фуқароларнинг Қорақалпоғистонда бўлиб ўтган воқеаларда содир этган қилмишларидан пушаймон экани, қарамоғида вояга етмаган фарзандлари борлиги, шунингдек оилавий шароити оғир экани, баъзи шахсларнинг оилада ёлғиз боқувчи бўлгани эътиборга олинган.
«Комиссия аъзолари ўз фаолиятини бошлаганидан буён фуқаролар мурожаатларини ўрганишга алоҳида эътибор қаратмоқда. Ҳар бир мурожаат дарҳол ўрганилиб, тегишли чоралар кўрилмоқда. Бугун 24 нафар гумонланувчининг жамоат кафиллиги асосида ўз оиласига қайтарилиши ҳам ушбу сай-ҳаракатларнинг натижасидир», — дейилади хабарда.
Эслатиб ўтамиз, бўлиб ўтган воқеаларни ҳар томонлама чуқур ва холисона тергов қилиш бўйича тергов жараёнлари давом этмоқда.
Изоҳ (0)