Тошкент шаҳар Чилонзор туманидаги жарима майдонларидан бирида йўл-патруль хизмати ходимлари ва фуқаролар ўртасида жанжал юз берди. Бу ҳақда Ички ишлар вазирлиги хабар қилди.
Қайд этилишича, ўша куни йўл-патруль хизмати ходимлари Nexia машинаси глушителига қўшимча ускуна — овоз кучайтиргич ўрнатилганини аниқлаган. Бу машина эгасининг шу куни маълум бўлган биринчи қоидабузарлиги бўлган.
Кейинроқ Nexia ҳайдовчисининг автомобиль ён, олди ойналарини рухсатномасиз қорайтириб олгани маълум бўлган.
Бундан ташқари, ҳайдовчининг етиб келган дўсти жарима майдонига вақтинча жойлаштирилган машинанинг қорайтирилган плёнкаларини ўзбошимчалик билан шилиб ташлаган.
Бир қанча қоидабузарлик содир этган Nexia ҳайдовчисига ЙПХ ходимлари маъмурий баённома расмийлаштирмоқчи бўлган. Аммо ҳайдовчининг етиб келган 3 нафар дўстлари бунга тўсқинлик қилиб, жанжал бошлаган. Тортишувга атрофдаги бошқа фуқароларни ҳам жалб қилган. Сўнг воқеани видеога олиб, ижтимоий тармоққа жойлаган.
Ҳолат юзасидан тарқалган видеода бир неча шахс Ички ишлар органлари ходимларининг қонуний фаолиятига аралашиб, инспекторларнинг огоҳлантиришларига қарамай жамоат тартибини бузган. Шунингдек, куракда турмайдиган гаплар айтиб, орган ходимларини обрўсизлантиришга уринган.
Бўлиб ўтган ҳолат юзасидан ҳужжатлар расмийлаштириб, жиноят ишлари бўйича Чилонзор туман судига тақдим этилган. Суд мажлисидан сўнг ЙПХ ходимларининг фаолиятига қаршилик қилган, жамоат тартибини бузиб, безорилик содир этган шахсларга нисбатан қарор қабул қилинган.
Унга кўра, фуқароларга Маъмурий жавобгарлик тўғрисидаги кодекснинг 183 (майда безорилик), 194-моддаси (ички ишлар органлари ходимининг қонуний талабларини бажармаслик) 1-қисмида баён этилган ҳуқуқбузарликни содир этганликда айбдор деб топилиб, шу кодекснинг 34-моддаси тартибида узил-кесил 10 сутка маъмурий қамоқ жазоси тайинланган.
Изоҳ (0)