Kiyev shahar kengashi, ularning fikricha, “Rossiya hamda sovet davri” bilan bog‘liq bo‘lgan 95 ta ko‘cha, tor ko‘cha va maydonlarni qayta nomladi, deb yozadi Meduza. Bu haqda Kiyev meri Vitaliy Klichko ma’lum qilgan.
Mer bir nechta misollarni keltirib o‘tdi. Masalan, Marshal Malinovskiy ko‘chasi “Azov” Polki Qahramonlari ko‘chasi, Tula maydoni UIA (Ukraina isyonchilar armiyasi) Qahramonlari maydoni, Piter ko‘chasi esa London ko‘chasi deb o‘zgartirilgan.
“Bu o‘z tariximiz talqinining yolg‘ondan manipulyatsiya qilinishi va unga Rossiya tajovuzkorining ta’sirini kamaytirish yo‘lidagi muhim qadamdir”, — dedi u.
Shu kuniyoq Odessa ma’muriyati shahardagi 200 dan ortiq Rossiya yoki SSSRga aloqador toponimlarni o‘zgartirishga tayyorlanayotganini ma’lum qildi.
Ukraina shaharlarida Rossiya bilan bog‘liq toponimlarni o‘zgartirish bo‘yicha kampaniya bir necha oylardan buyon davom etmoqda. Bir nechta yodgorliklar, masalan, Aleksandr Pushkinga atalgan haykallar ham olib tashlangan.
Moskvada Rossiya Ukrainaga bostirib kirganidan keyin Donetsk Xalq Respublikasi va Lugansk Xalq Respublikasi bilan nomlanuvchi maydonlar paydo bo‘ldi. Rossiyaning boshqa shaharlarida DXR arboblari, shu jumladan, ayirmachilarning marhum yetakchisi Aleksandr Zaxarcheno sharafiga nomlangan toponimlar (joy nomlari) paydo bo‘la boshladi.
Ukrainada 2015-yilda natsistlar va kommunistlar rejimlarini jazolash to‘g‘risida qonun qabul qilingach, sovet davriga taalluqli deb hisoblanilgan ko‘plab toponimlar qayta nomlangandi. Rossiya elchixonasining konsullik bo‘limi joylashgan Panfilovchilar ko‘chasi Ko‘ngillilar batalyoni ko‘chasi deb o‘zgartirilgan edi.
Izoh (0)