Ozarbayjon Armaniston bilan chegara yaqinidagi shaharga qo‘shinlarini joylashtirdi

Ozarbayjon armiyasi mamlakat g‘arbidagi Lochin shahrini egalladi, Sus va Zabux qishloqlari Boku nazorati ostiga olindi. Bu haqda respublika prezidenti Ilhom Aliyev o‘z Twitter’ida ma’lum qildi, deb yozadi “RBK”.

“Barcha lochinliklarni va Ozarbayjon xalqini bunday bayram bilan tabriklayman. Yashasin Lochin! Yashasin Ozarbayjon!” — deb yozdi u.

Ushbu aholi punktlari 2021-yilda nizo keskinlashganidan keyin tuzilgan uch tomonlama bitimga muvofiq, Armaniston va Tog‘li Qorabog‘ni bog‘lovchi yagona quruqlik yo‘li — olti kilometrli Lochin yo‘lagining bir qismi hisoblanadi. Lochin, Sus va Zabux Rossiya tinchlikparvar kuchlari nazorati ostida edi. Avgust boshida Boku 25-avgustga qadar ular ustidan nazoratni topshirishni talab qildi. Yerevan rozi bo‘ldi, mahalliy aholini hukumat evakuatsiya qilishga qaror qildi.

Ozarbayjon o‘z talabiga dalil sifatida Armanistonni Tog‘li Qorabog‘ bilan bog‘laydigan yangi yo‘lning o‘ziga tegishli qismini qurib bo‘lgani pesh qildi. Armaniston Xavfsizlik kengashi Bokuning talabini g‘ayriqonuniy deb atadi va “Tex — Kornidzor” M-12 trassasini qayta qurish aslida boshlanganiga qaramay, Yerevan hozircha hech bir qurilish rejasiga rasman rozilik bermaganini ta’kidladi. Xavfsizlik kengashi kotibi Armen Grigoryan eslatishicha, uch tomonlama bitimda yangi yo‘nalishni kelishib olishga uch yil vaqt berilgan.

Armaniston va Ozarbayjon Rossiya vositachiligida uch tomonlama bitimni 2020-yil noyabrida imzolagan edi. Aliyev shartnomani g‘alaba deb atadi, Armaniston bosh vaziri Nikol Pashinyan qurolli nizoni to‘xtatish uchun uni imzolashga majbur bo‘lganini aytdi. Mintaqaga Rossiya tinchlikparvarlari joylashtirildi.

Ikkala tomon ham bitimning ijro etilishi yuzasidan noroziliklar bildirgan. Aliyev Armanistonni Tog‘li Qorabog‘dan o‘z qo‘shinlarini olib ketishdan bosh tortishda ayblagan va Rossiya Mudofaa vazirligi yuqori mansabli vakili (kimligiga aniqlik kiritilmagan) shunday va’da berganiga qaramay, progressga erishilmaganini aytgan.

Pashinyan o‘z navbatida Ozarbayjon tomonidan Tog‘li Qorabog‘dagi bir qator hududlar, shu jumladan, 2020-yilda Xsaberd va Xin Tager qishloqlari, 2022-yilda Parux qishlog‘i “bosib olinishi” fonida rossiyalik tinchlikparvarlarga savollari borligini aytgan. Uning so‘zlariga ko‘ra, bu voqealarning barchasi Rossiya tinchlikparvarlari ko‘z o‘ngida yuz bergan, shu tufayli u Tog‘li Qorabog‘dagi tinchlikparvarlik operatsiyasi tafsilotlarini aniqlashtirishga katta zaruriyat tug‘ilganini ta’kidlagan.