Актриса Дурдона Турсунбоева томошабинларга «Оталар сўзи— ақлнинг кўзи» теленовелласидаги турли образлари, шунингдек, «Сардор» сериалидаги сержант роли билан яхши таниш. У 12 йилдан бери Америкада истиқомат қилмоқда. «Дарё» мухбири Наргизахон Муродова Дурдона Турсунбоева билан АҚШга кетишининг сабаби ва у ердаги ҳаёти ҳақида суҳбатлашди.
«Мен Америкага эмас, Тошкентга интилганман»
— Асли Қозоғистонда туғилганман, аммо доим мактабда «Менинг орзуйим» мавзусида иншо ёздиришса, «Тошкентга кетиб, санъат олийгоҳида ўқийман», деб ёзардим. Чунки жуда кўплаб машҳур санъаткорлар айнан Тошкентдаги санъат олийгоҳида таҳсил олишгани ҳақида эшитгандим. Ниятим амалга ошиб, ҳеч кимнинг ёрдамисиз Тошкентга келдим. Аммо қачонлардир АҚШга кетиб, ҳаммасини қайтадан бошлайман, деб хаёлимга ҳам келтирмагандим. Америкага келиш фикри қаердан пайдо бўлди, нега таваккал қилдим, деб ҳалигача ўйлайман. Чунки дўстларим билан ҳазиллашиб, Америка элчихонасига ҳужжат топширгандим. Одамлар бир неча йил ҳаракат қилиб қўлга киритадиган визани мен илк уринишдаёқ қўлга киритдим. Ҳатто визани қўлга олганимда ҳам кетиш фикрим қатъий эмас эди. Бир йиллик визанинг уч ойини Тошкентда ўтказиб, кейин АҚШга келганман.
«Нима қилиб қўйдим, деб ич-этимни еганман»
— Одатда АҚШга келмоқчи бўлганлар виза олишдан аввал таниш-билиш излашга тушишади. Аммо менда ҳаммаси ноодатий бўлган. Бу ерга 2010 йилнинг декабрь ойида келганман. Ўзбекистонда қиш у қадар қаҳратон бўлмагани учун АҚШга келиб, ҳақиқий қиш қандай бўлишини билгандим. Эгнимда юпқа пальто, оёғимда эса калта этик кийиб, бу ерни ҳам Тошкентдек илиқ деб ўйлаган эканман.
Одамни музлатиб қўядиган совуқда меҳмонхона излаб, энг арзонига жойлашганман. Кунига 75 доллардан пул тўлардим. Ишонасизми, «Нима қилиб қўйдим», деб ўйлайверганимдан ташқарига умуман чиқмаганман. Ўрнимдан ҳам тургим келмай, ёстиқни қучиб ётавердим. Охири учинчи кун нима бўлса бўлди, деб ташқарига чиққанман. Яхши ҳамки, аэропортдаги қизлар Нью-Йорк штатидаги Queens шаҳрини кўрсатишган экан. Бу ерда ўзбек ва рус миллатига мансуб одамлар кўплиги учун «Инглиз тилини билмаган инсонларга бу ерда яшаш осон», дейишганди. Атроф билан танишиш учун кўчанинг у бошидан бу бошига қараб юраверганман. Кейин гўшт сотадиган дўконга дутор илинганини кўриб, қувонганимдан ичкарига киргандим. Бу ерда 30 йил аввал АҚШга кўчиб келган бухороликлар савдо қилишар экан. Уларнинг ёрдами билан арзон уйга жойлашганман.
«Қадоқловчиликдан заргарликкача...»
— АҚШда иш топиш қийин эмас. Фақат ҳаммаси бирдан осонликча бўлмайди. Масалан, АҚШдаги илк ишим буюртмаларни қадоқлаш бўлган. Яъни интернет дўконидаги сотилган буюмларни қадоқлаш билан шуғулланганман. Ундан кейин компьютер билан ишлашни бошладим. У дўкон косметик маҳсулотлар савдоси билан шуғулланарди. Ишим ўзимга жуда ёқарди, аммо бу иш соғлиғимга салбий таъсир этаётганини сездим.
Аммо ўша вақтда ҳам инглиз тилидаги кундалик сўзлардан бошқасини билмасдим. Манхэттенда тил ўрганиб, ўз устимда ишлашга қарор қилдим. У ерда тақинчоқлар савдоси билан шуғулланадиган инсонлар билан танишдим. Фаолиятим яна аёллар билан боғланди. Заргарлик буюмларини фарқлаш, уларга тош қўйиш ва ясашни ўргандим. Ишим ўзимга завқ бағишларди. Чунки болалигимда санъаткор бўлмасам, шифокор ёки дизайнер бўламан, деб орзу қилардим. Тақинчоқлар дизайнерлигига шунчалик қизиқиб кетдимки, у ҳаётимнинг мазмунига айланди. Бу бўйича курсларда таҳсил олиб, бриллиантларни фарқлашни ҳам ўргандим.
«Турмуш ўртоғим тил ўрганишимни истади»
— Ҳар биримиз Яратган чизиб берган тақдир йўлидан юрарканмиз. Мен ҳеч қачон АҚШга келишни ва бу ерда яна турмуш қуриб, фарзандли бўлишни тасаввур қилмагандим. Манхэттенда заргарлик билан шуғулланадиган эронлик инсон билан оила қурдим. Қайнонам, турмуш ўртоғим ва икки ўғлим билан бирга яшаймиз. Турмуш ўртоғим АҚШдаги йирик тадбиркорлардан бири ҳисобланади. У анча йиллардан буён бриллиантлар савдоси билан шуғулланади.
Турмуш ўртоғим ўқишимни, тил ўрганишимни истади. Оз вақт ичида унинг тадбиркорликдаги партнёрига айландим. Аммо ўғлимиз туғилгач, фаолиятимни бироз чекладим. Ҳозир ҳам ишлар кўпайиб кетса, турмуш ўртоғимга ёрдамлашаман. Қолган пайт эса уй ишлари ва ўғилларим тарбияси билан бандман. Яқинда Ўзбекистонга бориб, катта ўғлим Камронни ҳам АҚШга олиб келдим. У ҳам бу ерга мослашяпти.
«Театр билан боғлиқ ширин хотираларим кўп»
— Ўйлаб қарасам, илгари ҳеч нарсадан қўрқмайдиган, таваккалчи бўлган эканман. Кутилганидек бўлмаса, жабрини фақат ўзим тортаман-ку, деб таваккал қилишдан ҳайиқмасдим. Ҳозир эса бир қарорга келишдан аввал узоқ ўйлайман, турмуш ўртоғим, ҳатто болаларим билан ҳам маслаҳатлашаман. Баъзи пайтларда ижтимоий тармоқларда Ўзбек миллий академик драма театри ҳақидаги маълумотларни ўқиб, афсусланаман. Чунки у ерда 13 йил ишладим, театр билан боғлиқ ширин хотираларим жуда кўп. Туркиядаги фестивалда режиссёр Валижон Умаровнинг «Аёлғу» спектакли билан иштирок этганмиз. Шодия Тўхтаева билан Фотима ва Зуҳра ролларини ижро этгандик. Ўшанда катта ўғлим Камронга ҳомиладор эдим. Ҳамкасбларим мени авайлаб, барча қулайликларни яратиб беришганди.
АҚШда ҳамма нарса бор, аммо барибир нимадир етишмаётгандек туюлади. Баъзан севимли ишим билан шуғуллангим келади. Бу ерда қолиб кетишни истамаётганимни ҳам ич-ичимдан ҳис қиламан.
«Катта гапирмаслик керак»
— Илгари «Оталар сўзи — ақлнинг кўзи» деган теленовеллалар намойиш этиларди. Кинолар бир йилда намойиш этилса, теленовелла ҳар ҳафта эфирга узатиларди. Аммо баъзи режиссёрлар новеллаларга паст назар билан қарашарди. Мен эса теленовеллада кўп суратга тушадиган актрисалардан бири эдим. Кинорежиссёрлардан бири «Оталар сўзида суратга тушманг, бўлмаса кинога ололмаймиз», деган. Новеллани ҳар ҳафта орзиқиб кутадиган мухлислар сабаб ундаги таклифларни рад этишни истамаганман.
Баъзан дугоналарим қистови билан кастингларга борардим. «Сардор» сериалида ҳам курсдошим Нигора Каримбоева билан бориб, бирга кастинг топширгандик. «Шайтанат»да ҳам шундай бўлган.
Одам катта гапирмаслиги керак, деб бекорга айтишмайди. Бир пайтлар теленовеллаларни камситган режиссёрлар бугун шу ишдан нон еб юришибди.
«Этюд нималигини билмаганлар саҳна юлдузи»
— Театр ва кинога қайтгим келади. Аммо орадан шунча вақт ўтди, энди ўзимни бу соҳада аввалгидек эркин ҳис қилоламанми, деб ўйлайман. Кейин ҳозирги талаблар аввалгидан ўзгарган. Санъат олийгоҳида ўқимаган, этюд нима эканлигини билмаган ва умри давомида битта масални ёдламаганлар саҳна юлдузи бўлиб юришибди. Уларни шунчалик ура-ура билан кўтаришяптики, ҳайрон қоламан. Менга бундай ижод қилиш ёқмайди. Ҳаммаси профессионал бўлгани яхши.
Яқинда турмуш ўртоғим YouTube’га жойланган ўзбек киносини кўрсатиб, «Нега сизлардаги ҳамма актрисалар бир хил?» деб кулди. Йўқ, ундай эмас, дедим-у, аммо унинг гапларида жон борлигини ич-ичимдан ҳис қилдим. Баъзи актрисаларда ўзига хослик йўқолган. Аёл гўзал бўлишга интилади, аммо бу билан ўзлигини йўқотиб қўймаслиги керак. Америка ва турк фильмларини кузатиб бораман. Бу ерда фильтрдан ва ортиқча бўянишдан тийилишади. Тўғри, улар ҳам пластик операциялардан фойдаланишади. Аммо бу ерларда табиийлик кўпроқ қадрланади.
«АҚШ ҳеч кимни ўзгартирмайди»
— «Америка боланинг тарбиясига акс таъсир этади, шунинг учун уни бу ерга олиб келмаяпман», деган гапни кўп эшитаман. Тўғри, ҳамманинг ўз фикри бор. Аммо, менимча, АҚШ ҳеч кимни ўзгартирмайди, бола ҳам тарбияни аввало ота-онасидан олади. Яхши тарбияланган бола кўчага чиқиб, бирдан ўзгариб қолмайди.Америкаликлардан ҳам ўрганишимиз керак бўлган жиҳатлар жуда кўп. Бу ердагилар пул топишни ҳам, шунга яраша ҳордиқ чиқаришни ҳам билишади. Кейин АҚШда ёши улғайганида ўқиш ҳам табиий ҳол. Мен ҳам АҚШга келгач, 5 йилдан сўнг тил курсларига бориб, ўқидим. Ҳозир ҳам ўқияпман, — дейди Ўзбек миллий академик драма театрининг собиқ актрисаси Дурдона Турсунбоева.
Мавзуга доир:
- «Америка орзулар мамлакати эмас, бу ерда доллардан бошқа ҳеч нарса йўқ». 5 йилдан буён АҚШда яшаётган телебошловчи Равшан Ҳакимов билан суҳбат
- АҚШга кўчиб кетган ўзбекистонлик машҳурлар (фото)
- Соҳиб Аббосхон АҚШда меҳмонхонада сувоқчилик қилгани ва қизининг сўзлари уни йиғлатгани ҳақида гапирди (видео)
- Гулчеҳра Эшонқулова илк марта АҚШга кетиши сабаби, турмуш ўртоғидан 13 ёш катталиги ҳақидаги гаплардан чарчагани ҳақида гапирди (видео)
Изоҳ (0)