Андижондан туриб Бухородаги фуқароларнинг пластик карталаридаги пулларини ечиб олган талаба ушланди

Бухорода ижтимоий тармоқлар орқали бир неча шахсларни чув туширган киберфирибгар фош этилди, деб хабар бермоқда Ички ишлар вазирлиги.

Жондор тумани Ички ишлар бўлими томонидан берилган маълумотга кўра, номаълум шахс текин бойлик орттириш мақсадида 2022 йил 27 май куни Жондор тумани «Чорзона» маҳалласида яшовчи, Й.М.нинг пластик картасидан 1 миллион сўм, 2022 йил 19 июнь куни Жондор туман «Алели» маҳалласида яшовчи Б.А.нинг пластик картасидан 800 минг сўм, 2022 йил 21 июнь куни шу туманнинг «Далмун» маҳалласида яшовчи М.Ф.нинг пластик картасидан 800 минг сўм пулларни алдов йўли билан қўлга киритган.

Мазкур ҳолатлар юзасидан туман Ички ишлар бўлими томонидан номаълум шахсга нисбатан Жиноят кодексининг 168-моддаси (фирибгарлик) 3-қисми билан жиноят иши қўзғатилган.

Тергов натижасида ушбу жиноятларни Андижон вилояти Балиқчи тумани «Нурафшон» маҳалласида яшовчи Андижон давлат тиббиёт институтининг Й.Ҳ. (1998 йилда туғилган) исмли талабаси содир қилгани аниқланган.

Ҳозирги кунда ушбу шахснинг содир этилиб, фош этилмасдан қолаётган бу турдаги жиноятларга алоқадорлигини аниқлаш борасида тергов ҳаракатлари давом эттирилмоқда.