“O‘zbekinvest” sug‘urta kompaniyasi “Axbor-reyting” agentligidan milliy shkala bo‘yicha eng yuqori to‘lov qobiliyati reytingini oldi.
Joriy yil avgust oyida “Axbor-reyting” reyting agentligi “O‘zbekinvest” eksport-import sug‘urta kompaniyasiga milliy shkala bo‘yicha “Barqaror” prognozi bilan “uzA++” darajasida to‘lov qobiliyati reytingini berdi.
Belgilangan daraja milliy reyting shkalasi bo‘yicha sug‘urta kompaniyasining to‘lov qobiliyatining eng yuqori bahosi bo‘lib, o‘z majburiyatlarini hamda sug‘urta polisi egalarining talablarini belgilangan vaqtda va to‘liq bajarishda nodir qobiliyatga ega bo‘lgan kompaniyalarga beriladi.
Agentlik reyting darajasiga ta’sir qiluvchi bir qator ijobiy omillarni qayd etdi:
- sug‘urta xizmatlarining keng hududiy qamrovi va assortimenti;
- biznesni kengaytirish ko‘rsatkichlarining ijobiy tendensiyasi;
- yuqori bozor ulushi va sug‘urta bozorida yetakchi o‘rni;
- hududlar bo‘yicha sug‘urta tushumlarining ijobiy diversifikatsiyasi;
- sug‘urta kompaniyasi biznes faolligining yuqoriligi va sug‘urta xizmatlari bozorining asosiy segmentlarini jadal qamrab olishi;
- zamonaviy axborot texnologiyalari va moliyaviy vositalarni faol joriy etilishi;
- yuqori darajadagi to‘lov qobiliyati;
- tajribali boshqaruv jamoasi.
Kompaniyaning amaldagi shartnomalari soni 2020-yil yakunlariga nisbatan 117 foizga oshib, 939,1 mingtani tashkil etdi. Shundan 854,9 mingtasi jismoniy shaxslar bilan tuzilgan.
“O‘zbekinvest” aksiyadorlik jamiyatining yig‘ilgan jami sug‘urta mukofotlari 2020-yilga nisbatan 147 foizga o‘sish bilan 382,8 milliard so‘mni tashkil etdi.
Kompaniyaning sug‘urta to‘lovlari 89,3 milliard so‘m bo‘lib, 2020-yilning mos davriga nisbatan 22,7 milliard so‘mga ko‘pdir. Natijada kompaniyaning sug‘urta sohasi bo‘yicha to‘lovlar barcha xajmlardagi ulushi 14,6 foizni tashkil etdi.
Barqaror o‘sish tendensiyasi 2022-yilda ham davom etdi. Joriy yilning birinchi yarim yilligi yakunlari bo‘yicha “O‘zbekinvest” AJ biznes hajmini 167 foizga oshirgan holda, 240 milliard so‘mlik sug‘urta mukofotlarini yalpi tushumini ta’minladi va milliy sug‘urta bozorida yetakchilik mavqeini mustahkamladi.
Tovar va xizmatlarning milliy eksportchilari 1,1 milliard AQSH dollari miqdorida sug‘urta himoyasi bilan ta’minlandi. Bu O‘zbekistonning noxomashyo eksportining 29 foizini tashkil etdi.
2022-yilning birinchi yarmida xalqaro sug‘urta va qayta sug‘urta bozorlarida sug‘urta operatsiyalarini jadal va barqaror rivojlantirilishi davom etdi. 149,6 milliard so‘m yoki 13,8 million dollar ekvivalentida yalpi qayta sug‘urta mukofotlari tushumi ta’minlandi va bu 2021-yilning shu davriga nisbatan 2,5 barobar ko‘pdir. Shu bilan birga, kompaniya sug‘urta portfelidagi sug‘urta xizmatlari eksportining ulushi 62 foizni tashkil yetdi. Bu yo‘nalishda kompaniya AQSH, Buyuk Britaniya, Germaniya, Shveysariya, Fransiya, Xitoy, Rossiya va boshqa mamlakatlarning yetakchi jahon sug‘urta va qayta sug‘urta kompaniyalari bilan hamkorlik qiladi.
E’tiborli jihati shundaki, 2022-yil mart oyida kompaniyaning xalqaro kredit reytingi A.M. Best Company (AQSH) tomonidan yana bir bor “Barqaror” prognozi bilan “bb” darajasida tasdiqlandi. Natijada, “O‘zbekinvest” eng yuqori reyting sohibi va O‘zbekistonda ushbu agentlikdan xalqaro reytingni olgan birinchi tashkilotga aylandi.
“O‘zbekinvest” sug‘urta kompaniyasi respublikaning eksport salohiyatini rivojlantirish, tovar, ish va xizmatlar milliy eksportchilarini har tomonlama qo‘llab-quvvatlash bo‘yicha davlat siyosatini amalga oshirishni davom ettirmoqda.
Investorlar va investitsiya loyihalarini, shu jumladan, erkin iqtisodiy, kichik sanoat va ixtisoslashtirilgan zonalar hududlarida sug‘urta qilish tadbirlari amalga oshirilmoqda.
O‘zbekistonning mahalla va aholi punktlarida “mahallabay” tizimi bo‘yicha ish tubdan kengaymoqda.
Shuningdek, kompaniyada biznes-jarayonlarini raqamlashtirishga tubdan o‘tish bo‘yicha ishlar olib borilmoqda:
- · mijozlarga xizmat ko‘rsatish uchun biometrik axborot tizimi – Face ID’ni joriy etish;
- · elektron polislar mahsulotlari qatorini ko‘paytirish, shu jumladan, korporativ mijozlar segmenti uchun ham;
- · chakana sotuvlar tarkibida elektron polislar (E-polis) ulushini 2022-yil oxiriga qadar 90 foizga yetkazish;
- · sug‘urta to‘lovlarini to‘lash bo‘yicha da’vo arizalarini onlayn taqdim etishning interaktiv tizimini ishlab chiqish;
- · axborot xavfsizligini ta’minlash bo‘yicha infratuzilmani takomillashtirish.
Izoh (0)