«Ўзбекинвест» суғурта компанияси «Ахбор-рейтинг» агентлигидан миллий шкала бўйича энг юқори тўлов қобилияти рейтингини олди.
Жорий йил август ойида «Ахбор-рейтинг» рейтинг агентлиги «Ўзбекинвест» экспорт-импорт суғурта компаниясига миллий шкала бўйича «Барқарор» прогнози билан «uzА++» даражасида тўлов қобилияти рейтингини берди.
Белгиланган даража миллий рейтинг шкаласи бўйича суғурта компаниясининг тўлов қобилиятининг энг юқори баҳоси бўлиб, ўз мажбуриятларини ҳамда суғурта полиси эгаларининг талабларини белгиланган вақтда ва тўлиқ бажаришда нодир қобилиятга эга бўлган компанияларга берилади.
Агентлик рейтинг даражасига таъсир қилувчи бир қатор ижобий омилларни қайд этди:
- суғурта хизматларининг кенг ҳудудий қамрови ва ассортименти;
- бизнесни кенгайтириш кўрсаткичларининг ижобий тенденцияси;
- юқори бозор улуши ва суғурта бозорида етакчи ўрни;
- ҳудудлар бўйича суғурта тушумларининг ижобий диверсификацияси;
- суғурта компанияси бизнес фаоллигининг юқорилиги ва суғурта хизматлари бозорининг асосий сегментларини жадал қамраб олиши;
- замонавий ахборот технологиялари ва молиявий воситаларни фаол жорий этилиши;
- юқори даражадаги тўлов қобилияти;
- тажрибали бошқарув жамоаси.
Компаниянинг амалдаги шартномалари сони 2020 йил якунларига нисбатан 117 фоизга ошиб, 939,1 мингтани ташкил этди. Шундан 854,9 мингтаси жисмоний шахслар билан тузилган.
«Ўзбекинвест» акциядорлик жамиятининг йиғилган жами суғурта мукофотлари 2020 йилга нисбатан 147 фоизга ўсиш билан 382,8 миллиард сўмни ташкил этди.
Компаниянинг суғурта тўловлари 89,3 миллиард сўм бўлиб, 2020 йилнинг мос даврига нисбатан 22,7 миллиард сўмга кўпдир. Натижада компаниянинг суғурта соҳаси бўйича тўловлар барча хажмлардаги улуши 14,6 фоизни ташкил этди.
Барқарор ўсиш тенденцияси 2022 йилда ҳам давом этди. Жорий йилнинг биринчи ярим йиллиги якунлари бўйича «Ўзбекинвест» АЖ бизнес ҳажмини 167 фоизга оширган ҳолда, 240 миллиард сўмлик суғурта мукофотларини ялпи тушумини таъминлади ва миллий суғурта бозорида етакчилик мавқеини мустаҳкамлади.
Товар ва хизматларнинг миллий экспортчилари 1,1 миллиард АҚШ доллари миқдорида суғурта ҳимояси билан таъминланди. Бу Ўзбекистоннинг нохом ашё экспортининг 29 фоизини ташкил этди.
2022 йилнинг биринчи ярмида халқаро суғурта ва қайта суғурта бозорларида суғурта операцияларини жадал ва барқарор ривожлантирилиши давом этди. 149,6 миллиард сўм ёки 13,8 миллион доллар эквивалентида ялпи қайта суғурта мукофотлари тушуми таъминланди ва бу 2021 йилнинг шу даврига нисбатан 2,5 баробар кўпдир. Шу билан бирга, компания суғурта портфелидаги суғурта хизматлари экспортининг улуши 62 фоизни ташкил етди. Бу йўналишда компания АҚШ, Буюк Британия, Германия, Швейцария, Франция, Хитой, Россия ва бошқа мамлакатларнинг етакчи жаҳон суғурта ва қайта суғурта компаниялари билан ҳамкорлик қилади.
Эътиборли жиҳати шундаки, 2022 йил март ойида компаниянинг халқаро кредит рейтинги A.M. Best Company (АҚШ) томонидан яна бир бор «Барқарор» прогнози билан «бб» даражасида тасдиқланди. Натижада, «Ўзбекинвест» энг юқори рейтинг соҳиби ва Ўзбекистонда ушбу агентликдан халқаро рейтингни олган биринчи ташкилотга айланди.
«Ўзбекинвест» суғурта компанияси республиканинг экспорт салоҳиятини ривожлантириш, товар, иш ва хизматлар миллий экспортчиларини ҳар томонлама қўллаб-қувватлаш бўйича давлат сиёсатини амалга оширишни давом эттирмоқда.
Инвесторлар ва инвестиция лойиҳаларини, шу жумладан, эркин иқтисодий, кичик саноат ва ихтисослаштирилган зоналар ҳудудларида суғурта қилиш тадбирлари амалга оширилмоқда.
Ўзбекистоннинг маҳалла ва аҳоли пунктларида «маҳаллабай» тизими бўйича иш тубдан кенгаймоқда.
Шунингдек, компанияда бизнес-жараёнларини рақамлаштиришга тубдан ўтиш бўйича ишлар олиб борилмоқда:
- · мижозларга хизмат кўрсатиш учун биометрик ахборот тизими – Face ID’ни жорий этиш;
- · электрон полислар маҳсулотлари қаторини кўпайтириш, шу жумладан, корпоратив мижозлар сегменти учун ҳам;
- · чакана сотувлар таркибида электрон полислар (E-polis) улушини 2022 йил охирига қадар 90 фоизга етказиш;
- · суғурта тўловларини тўлаш бўйича даъво аризаларини онлайн тақдим этишнинг интерактив тизимини ишлаб чиқиш;
- · ахборот хавфсизлигини таъминлаш бўйича инфратузилмани такомиллаштириш.
Изоҳ (0)