“Sberbank” Qozog‘istonni tark etadi

Qozog‘istonning “Baiterek” milliy xoldingi va “Sberbank” o‘rtasida sotish va sotib olish bo‘yicha bitim imzolandi. Bu haqda Forbes xabar bermoqda.

Ta’kidlanishicha, “Sberbank” joriy geosiyosiy vaziyatdan va bank mijozlari manfaatlaridan kelib chiqib, Qozog‘iston bozoridan chiqishga qaror qilgan.

“Sberbank Kazakhstan yetarlicha likvidlik ta’minotiga, yuqori sifatli kredit portfeliga ega va ko‘p yillar davomida Qozog‘iston moliya bozorining asosiy ishtirokchilaridan biri bo‘lib kelgan”, — deyiladi xabarda.

Qayd etilishicha, bank mijozlar oldidagi barcha majburiyatlarini bajarishda davom etadi va mavjud mijozlarga bank mahsulotlari uchun barcha shart-sharoitlar o‘zgarishsiz qoladi.

“Bu kelishuv bankning faoliyatini to‘liq tiklash, omonatlarni jalb qilish va to‘lovlarni amalga oshirish, shuningdek, aholi va tadbirkorlik subyektlari uchun mahsulot va xizmatlarni rivojlantirishni davom ettirish imkonini beradi”, — deyiladi xolding xabarida.

Tomonlar kelishuvni yaqin vaqt ichida yakunlashni rejalashtirmoqda.

Avvalroq “Sberbank” O‘zbekistondagi kartalarga pul o‘tkazish komissiyasini bekor qilishi haqida xabar berilgan edi.