Yaponiya mehnat bozoriga besh ming nafar o‘zbek ishchilarini olib kirish rejalashtirilgan. Bu haqda “Daryo”ga ayni paytda Yaponiyada bo‘lib turgan Bandlik va mehnat munosabatlari vazirligi axborot xizmati rahbari Mavjuda Mirzayeva xabar berdi.
Ta’kidlanishicha, vazirlik mas’ullaridan iborat jamoa ayni paytda Yaponiyada bo‘lib, mazkur masala yuzasidan yapon ish beruvchilari bilan muzokara o‘tkazmoqda.
Vazirlik mas’uli Mavjuda Mirzayevaning ma’lumot berishicha, Yaponiya davlatida 14 turdagi ishchilar uchun xorijdan ishchi kuchi olib kirish tizimi mavjud.
“Yaponiyada asosan 14 turdagi ish uchun xorijdan ishchi kuchi olib kiriladi. Bizga aynan qishloq xo‘jaligida ishlovchi va keksalarni parvarishlovchi topib berish taklifi berilgan. Bundan tashqari patronaj hamshira, ishlab chiqarish va servis sohasida, shuningdek qurilishda ishlovchilarga ham talab ko‘p”, — deydi Mavjuda Mirzayeva.
Qo‘shimcha qilinishicha, 2023-yil O‘zbekistondan Yaponiyaga 1000 nafar ishchi olib boriladi.
“Mehnat vazirligi sa’y-harakati bilan 2023-yil 1000 nafar yapon tilini o‘rgangan o‘zbek ishchisi Yaponiyada ish boshlaydi. 2025-yilga qadar esa 5000 nafar ishchi muqim ish o‘rinlariga ega bo‘ladi. Shuningdek, yildan yilga shartnoma asosida ishchilar soni ham ko‘payib boradi. Vazirlik mas’ullari ayni shu niyatda Yaponiyaga safar uyushtirgan”, — deydi mehnat vazirining matbuot kotibi.
Izoh (0)