Япония меҳнат бозорига беш минг нафар ўзбек ишчиларини олиб кириш режалаштирилган. Бу ҳақда «Дарё»га айни пайтда Японияда бўлиб турган Бандлик ва меҳнат муносабатлари вазирлиги ахборот хизмати раҳбари Мавжуда Мирзаева хабар берди.
Таъкидланишича, вазирлик масъулларидан иборат жамоа айни пайтда Японияда бўлиб, мазкур масала юзасидан япон иш берувчилари билан музокара ўтказмоқда.
Вазирлик масъули Мавжуда Мирзаеванинг маълумот беришича, Япония давлатида 14 турдаги ишчилар учун хориждан ишчи кучи олиб кириш тизими мавжуд.
«Японияда асосан 14 турдаги иш учун хориждан ишчи кучи олиб кирилади. Бизга айнан қишлоқ хўжалигида ишловчи ва кексаларни парваришловчи топиб бериш таклифи берилган. Бундан ташқари патронаж ҳамшира, ишлаб чиқариш ва сервис соҳасида, шунингдек қурилишда ишловчиларга ҳам талаб кўп», — дейди Мавжуда Мирзаева.
Қўшимча қилинишича, 2023 йил Ўзбекистондан Японияга 1000 нафар ишчи олиб борилади.
«Меҳнат вазирлиги саъй-ҳаракати билан 2023 йил 1000 нафар япон тилини ўрганган ўзбек ишчиси Японияда иш бошлайди. 2025 йилга қадар эса 5000 нафар ишчи муқим иш ўринларига эга бўлади. Шунингдек, йилдан йилга шартнома асосида ишчилар сони ҳам кўпайиб боради. Вазирлик масъуллари айни шу ниятда Японияга сафар уюштирган», — дейди меҳнат вазирининг матбуот котиби.
Изоҳ (0)