Samarqand viloyatida joylashgan “Jartepa” chegara bojxona postida ko‘p miqdordagi chet el valyutasini qo‘shni davlatga olib chiqib ketmoqchi bo‘lgan shaxs ushlandi. Bu haqda viloyat bojxona boshqarmasi xabar berdi.
Xabarga ko‘ra, 29-aprel kuni fuqaro B.O. “yashil” yo‘lak orqali harakatlanib, O‘zbekistondan qo‘shni davlatga chiqib ketmoqchi bo‘lgan. Biroq bojxona xodimlari yo‘lovchini to‘xtatib, uni belgilangan tartibda bojxona nazoratidan o‘tkazgan.
Aniqlanishicha, B.O. bojxona deklaratsiyasiga kiritmasdan, tanasining bel qismida saqlagan holda bojxona nazoratidan yashirib, jami 207 million 944 ming 280 so‘m ekvivalentidagi 18 600 dollarni mamlakatdan olib ketayotgan bo‘lgan.
Ushbu holat amaldagi jinoyat qonunchiligiga ko‘ra juda ko‘p miqdordagi valyuta qimmatliklarni O‘zbekiston Respublikasi bojxona chegarasidan o‘tkazish hisoblanadi. Holat yuzasidan sudning hukmi bilan sudlanuvchi B.O.ga bazaviy hisoblash miqdorining 100 baravari miqdorida (eski BHM hisobi — 270 ming so‘m) 27 million so‘m jarima jazosi tayinlangan.
Shuningdek, 18 600 dollar miqdordagi pullar davlat foydasiga musodara qilingan hamda sudlanuvchi 10 yil muddatga O‘zbekiston hududiga kirishi cheklangan.
Izoh (0)