Самарқанд вилоятида жойлашган «Жартепа» чегара божхона постида кўп миқдордаги чет эл валютасини қўшни давлатга олиб чиқиб кетмоқчи бўлган шахс ушланди. Бу ҳақда вилоят божхона бошқармаси хабар берди.
Хабарга кўра, 29 апрель куни фуқаро Б.О. «яшил» йўлак орқали ҳаракатланиб, Ўзбекистондан қўшни давлатга чиқиб кетмоқчи бўлган. Бироқ божхона ходимлари йўловчини тўхтатиб, уни белгиланган тартибда божхона назоратидан ўтказган.
Аниқланишича, Б.О. божхона декларациясига киритмасдан, танасининг бел қисмида сақлаган ҳолда божхона назоратидан яшириб, жами 207 миллион 944 минг 280 сўм эквивалентидаги 18 600 долларни мамлакатдан олиб кетаётган бўлган.
Ушбу ҳолат амалдаги жиноят қонунчилигига кўра жуда кўп миқдордаги валюта қимматликларни Ўзбекистон Республикаси божхона чегарасидан ўтказиш ҳисобланади. Ҳолат юзасидан суднинг ҳукми билан судланувчи Б.О.га базавий ҳисоблаш миқдорининг 100 баравари миқдорида (эски БҲМ ҳисоби — 270 минг сўм) 27 миллион сўм жарима жазоси тайинланган.
Шунингдек, 18 600 доллар миқдордаги пуллар давлат фойдасига мусодара қилинган ҳамда судланувчи 10 йил муддатга Ўзбекистон ҳудудига кириши чекланган.
Изоҳ (0)