Toshkentda biometrik ma’lumotlar asosida inson yuzini tanish tizimi ishga tushiriladi. Bu haqda Xalq deputatlari Toshkent shahar kengashining 69-sessiyasida ma’lum qilindi, deya xabar bermoqda poytaxt hokimligi.
Sessiyada deputatlar IIV Kiberxavfsizlik markazi mas’ul xodimi Shavkat Fayziyevning “Biometrik ma’lumotlarga asoslangan yuzni aniqlash va nazorat qilish tizimi loyiha konsepsiyasini tasdiqlash to‘g‘risida”gi axborotini muhokama qilgan.
Mutasaddining ta’kidlashicha, aholi salomatligi va jamoat tartibini saqlashda, huquqbuzarliklar oldini olishda, fuqarolar xavfsizligini ta’minlashda, inson huquqlari va erkinliklarini kafolatlashda ushbu tizim ahamiyati katta. Shu sababli Biometrik ma’lumotlarga asoslangan yuzni aniqlash va nazorat qilish kompleks tizimi yaratilmoqda.
Buning natijasida jamiyatda ko‘plab muammolarga yechim topiladi. Ilg‘or texnologiyalar asosida xavfsizlik ta’minlanadi, ijtimoiy obyektlar, jamoat joylarida nazorat va tezkor axborot tizimi takomillashtiriladi, biometrik ma’lumotlar bazasiga asoslangan nazoratni kuchaytirish mexanizmi joriy etiladi, inson huquqlari va qonuniy manfaatlarini ishonchli himoya qilishga erishiladi.
Shuningdek, aholi salomatligini ta’minlash, virusli, yuqumli kasalliklar tarqalishi, jinoyatchilik va terrorizm kabi xavf-xatarlar oldini olish yo‘nalishidagi ishlarga katta yordam bo‘ladi.
Izoh (0)