“Ayollar biznesi uchun birinchi qadam” tanloviga Ilm-fanni moliyalashtirish va innovatsiyalarni qo‘llab-quvvatlash jamg‘armasi hisobidan 10 milliard so‘m mablag‘ ajratildi. AOKAda o‘tkazilgan brifingda Innovatsion rivojlanish vazirligi axborot xizmati rahbari Nazokat Abduqunduzova bu haqda ma’lumot berdi.
Qayd etilishicha, startap loyihalarini moliyalashtirish bo‘yicha 2019–2022-yillar mobaynida 10 ta tanlov e’lon qilingan. Tanlovlarda har bir startap loyihasi 6 bosqichli saralashdan o‘tkaziladi. Shu kunga qadar tanlovlarga 2000 ga yaqin ariza kelib tushgan. 2019–2022-yillar davomida jami hisobda 104 milliard so‘mlik 155 ta startap loyiha moliyalashtirilgan. Startap loyihalarni moliyalashtirilishi natijasida jami 1279 ta yangi ish o‘rni yaratilgan.
2022-yil birinchi yarim yilligiga ko‘ra jami 12,9 milliard so‘mlik 16 ta startap loyiha moliyalashtirilgan. 2023-yil oxiriga qadar respublikaning barcha hududlarida yoshlar texnoparklari tashkil etilishi rejalashtirilgan. Vazirlik tashabbusi bilan startap loyihalarini moddiy qo‘llab-quvvatlash maqsadida 3 ta investitsiya kompaniyasi, 6 ta venchur fondi va 1 ta boshqaruv kompaniyasi faoliyati yo‘lga qo‘yilgan.
Izoh (0)