Ijtimoiy tarmoqlarda Chirchiq daryosiga rangli oqovalar tashlanayotgani haqida murojaat e’lon qilindi. Davlat ekologiya qo‘mitasi holatga munosabat bildirdi.
Qayd etilishicha, murojaat bo‘yicha Davlat ekologiya qo‘mitasi, Toshkent shahar va Toshkent viloyati Ekologiya va atrof-muhitni muhofaza qilish boshqarmalari xodimlaridan iborat maxsus ishchi guruh tuzilib, tezkor tartibda holat o‘rganilgan.
O‘rganishlar davomida haqiqatan ham Chirchiq daryosining Toshkent shahri Mirzo Ulug‘bek tumani “Chingeldi” MFY hududidan o‘tuvchi qismiga rangli eritmalar bilan ifloslangan oqovalar tashlanayotgani aniqlangan. Ushbu oqovalarning hosil bo‘lish manbai “Toshkent suv ta’minoti” MCHJga qarashli Toshkent viloyati “Baytqo‘rg‘on” MFY hududida joylashgan “Chirchiq oqova tozalash inshooti” ekani ma’lum bo‘lgan.
Holat bo‘yicha laboratoriya tahlillarini o‘tkazish maqsadida Davlat ekologiya qo‘mitasining Atrof-muhitni muhofaza qilish sohasida ixtisoslashtirilgan analitik nazorat markazining mutaxassislari jalb etilgan. Suv tahlillari uchun Chirchiq oqova tozalash inshootining Chirchiq daryosiga chiqaruvchi oqova suvlari tashlama nuqtasidan, oqovalarni daryoga qo‘shilish va 500 metr quyi nuqtalaridan suv namunalari olinib, tahlillar o‘tkazilmoqda.
Shuningdek, ishchi guruh tomonidan Chirchiq oqova tozalash inshootining holati, texnologik jarayonlari o‘rganilganda tozalash samaradorligi 40-50 foizdan ham pasayib ketgani tasdiqlangan.
Bundan tashqari, ishchi guruh tomonidan Chirchiq oqova tozalash inshootiga me’yordan ortiqcha ifloslangan turli rangli eritmalar tutgan oqova tashlaydigan 10 ta yirik korxona, shu jumladan, 6 ta tarkibida bo‘yoq sexlari bo‘lgan to‘qimachilik korxonalari ro‘yxati shakllantirilgan. Chirchiq shahridagi hamda Bo‘stonliq tumanidagi tarkibida bo‘yoq sexlari bo‘lgan yirik to‘qimachilik korxonalarining oqova tozalash inshootlarini o‘rganish maqsadida ekologik nazorat tadbirlari tashkil qilinmoqda. Buning uchun belgilangan tartibda biznes-ombudsmanga buyurtmalar tayyorlanib kiritiladi.
Ta’kidlanishicha, mazkur tozalash inshooti 1975-yilda qurilgan. Tozalash texnologiyasi va qurilmalar ma’nan eskirgan, shuningdek, quvvati 80 ming metr kub sutka bo‘lgani holda Toshkent viloyatining Chirchiq shahri, Bo‘stonliq va qisman Qibray tumanlarining tobora ortib borayotgan aholisi va sanoat korxonalarining oqovalarini qabul qilib kelmoqda.
Toshkent viloyatidagi tozalash inshootlari tizimlarini 2023—2026-yillarda qurish va rekonstruksiya qilish nazarda tutilgan va hukumatning alohida qarori qabul qilinib, loyihaning texnik-iqtisodiy asoslari ishlab chiqilmoqda.
Mavzuga doir:
Izoh (0)