Ижтимоий тармоқларда Чирчиқ дарёсига рангли оқовалар ташланаётгани ҳақида мурожаат эълон қилинди. Давлат экология қўмитаси ҳолатга муносабат билдирди.
Қайд этилишича, мурожаат бўйича Давлат экология қўмитаси, Тошкент шаҳар ва Тошкент вилояти Экология ва атроф-муҳитни муҳофаза қилиш бошқармалари ходимларидан иборат махсус ишчи гуруҳ тузилиб, тезкор тартибда ҳолат ўрганилган.
Ўрганишлар давомида ҳақиқатан ҳам Чирчиқ дарёсининг Тошкент шаҳри Мирзо Улуғбек тумани «Чингелди» МФЙ ҳудудидан ўтувчи қисмига рангли эритмалар билан ифлосланган оқовалар ташланаётгани аниқланган. Ушбу оқоваларнинг ҳосил бўлиш манбаи «Тошкент сув таъминоти» МЧЖга қарашли Тошкент вилояти «Байтқўрғон» МФЙ ҳудудида жойлашган «Чирчиқ оқова тозалаш иншооти» экани маълум бўлган.
Ҳолат бўйича лаборатория таҳлилларини ўтказиш мақсадида Давлат экология қўмитасининг Атроф-муҳитни муҳофаза қилиш соҳасида ихтисослаштирилган аналитик назорат марказининг мутахассислари жалб этилган. Сув таҳлиллари учун Чирчиқ оқова тозалаш иншоотининг Чирчиқ дарёсига чиқарувчи оқова сувлари ташлама нуқтасидан, оқоваларни дарёга қўшилиш ва 500 метр қуйи нуқталаридан сув намуналари олиниб, таҳлиллар ўтказилмоқда.
Шунингдек, ишчи гуруҳ томонидан Чирчиқ оқова тозалаш иншоотининг ҳолати, технологик жараёнлари ўрганилганда тозалаш самарадорлиги 40-50 фоиздан ҳам пасайиб кетгани тасдиқланган.
Бундан ташқари, ишчи гуруҳ томонидан Чирчиқ оқова тозалаш иншоотига меъёрдан ортиқча ифлосланган турли рангли эритмалар тутган оқова ташлайдиган 10 та йирик корхона, шу жумладан, 6 та таркибида бўёқ цехлари бўлган тўқимачилик корхоналари рўйхати шакллантирилган. Чирчиқ шаҳридаги ҳамда Бўстонлиқ туманидаги таркибида бўёқ цехлари бўлган йирик тўқимачилик корхоналарининг оқова тозалаш иншоотларини ўрганиш мақсадида экологик назорат тадбирлари ташкил қилинмоқда. Бунинг учун белгиланган тартибда бизнес-омбудсманга буюртмалар тайёрланиб киритилади.
Таъкидланишича, мазкур тозалаш иншооти 1975 йилда қурилган. Тозалаш технологияси ва қурилмалар маънан эскирган, шунингдек, қуввати 80 минг метр куб сутка бўлгани ҳолда Тошкент вилоятининг Чирчиқ шаҳри, Бўстонлиқ ва қисман Қибрай туманларининг тобора ортиб бораётган аҳолиси ва саноат корхоналарининг оқоваларини қабул қилиб келмоқда.
Тошкент вилоятидаги тозалаш иншоотлари тизимларини 2023—2026 йилларда қуриш ва реконструкция қилиш назарда тутилган ва ҳукуматнинг алоҳида қарори қабул қилиниб, лойиҳанинг техник-иқтисодий асослари ишлаб чиқилмоқда.
Изоҳ (0)