O‘zbekiston “ArMI-2022” o‘yinlarining “Qurolsoz usta” musobaqasida rekord qo‘yib, g‘alaba qozondi

Forish poligoni “ArMI-2022” xalqaro armiya o‘yinlarining “Qurolsoz usta” musobaqasi bo‘lib o‘tmoqda. Bu haqda Mudofaa vazirligi xabar qildi.

Qayd etilishicha, musobaqaning uchinchi bosqichida O‘zbekiston Respublikasi hamda Rossiya Federatsiyasi jamoalari “BM-21 MK” reaktiv artilleriya qurilmasini ta’mirlash bo‘yicha mahorat va tajribalarini namoyish qilgan.

Dastlab 4 nafardan iborat harbiy xizmatchilar reaktiv artilleriya qurilmasining 10 dona yuqori yo‘naltiruvchi paketlarini 108 dona qismlarga ajratish va yig‘ish, qurilmadagi nosozliklarni aniqlash va ta’mirlash, qurilmaning o‘ng o‘rta g‘ildigagini zaxira g‘ildirakka almashtirish, 10 dona 122 millimetrli o‘q-dorilar bilan o‘qlash va belgilangan yo‘nalishda otish mashg‘ulotini bajargan.

Musobaqa natijalariga ko‘ra, O‘zbekiston Respublikasi Mudofaa vazirligi terma jamoasi 9 daqiqa-yu 13 soniya natija bilan birinchi, Rossiya Federatsiyasi jamoasi esa 13 daqiqa 46 soniya natija bilan ikkinchi o‘rinni egallagan.

Shu orqali O‘zbekiston terma jamoasi 2021-yil Eron Islom Respublikasida o‘rnatilgan 11 daqiqa 10 soniya rekordni 1 daqiqa 57 soniyaga yangilagan.

Ta’kidlanishicha, bugungi kunga qadar “Qurolsoz usta” termasi uchta bosqichdagi musobaqada ham birinchi o‘rinni egallab, beshta rekord o‘rnatishga muvaffaq bo‘lgan.