Rossiya iyul oyida ketma-ket uchinchi oy Xitoyga neft yetkazib berish bo‘yicha yetakchilikni saqlab qoldi. Bu haqda Reuters xabar bermoqda.
O‘tgan oyda Xitoyga Rossiya neftining importi 7,15 mln tonnani tashkil etdi — kuniga taxminan 1,68 mln barrel. Bu o‘tgan yilga nisbatan 7,6 foizga ko‘p.
May oyidagi rekordni (kuniga taxminan 1,98 mln barrel va oyiga deyarli 8,42 mln tonna) iyul oyida yangilab bo‘lmadi. Iyun oyida Xitoyda Rossiya neftining importi 7,29 mln tonnani tashkil etdi.
Saudiya Arabistoni Xitoyga neft yetkazib berish bo‘yicha ikkinchi o‘rinda qolmoqda — iyul oyida Pekinga 6,56 mln tonna sotgan, Iroq esa 3,63 mln tonna bilan uchinchi o‘rinni egallagan.
G‘arb davlatlari Rossiyaga qarshi sanksiyalar kiritgach, Moskva Osiyoga neft yetkazib berishni oshirdi.
May oyida Kpler tahlilchilarining hisob-kitoblariga ko‘ra, Osiyo davlatlari Rossiyadan neft xarid qilish bo‘yicha birinchi marta Yevropani ortda qoldirgan.
Bosh vazir o‘rinbosari Aleksandr Novak Rossiyaning yangi xaridorlari borligini, Osiyo—Tinch okeani mintaqasi mamlakatlariga yetkazib berish hajmi oshganini aytdi.
Iyul oyi oxirida amerikalik senator Marko Rubio Rossiyaning Xitoyga neft yetkazib berishiga qarshi sanksiyalar to‘g‘risidagi qonun loyihasini taqdim etdi.
Izoh (0)