Yevropada gaz narxi 2 700 dollardan oshib ketdi

Yevropada gazning spot narxi ming kub metr uchun 2 700 dollardan oshdi. Bu haqda “Interfaks” xabar bermoqda.

Narxlarning bunday yuqorilashiga “Shimoliy oqim” gaz quvurlarida ta’mirlash ishlari olib borilishi munosabati bilan gaz yetkazib berish uch kunga to‘xtatilishi sabab bo‘ldi.

Juma kuni kechqurun ICE Futures birjasida eng yaqin (sentabr) TTF fyucherslari narxi ming kub metr uchun 2 712 dollarga yetdi.

Joriy shartnoma bo‘yicha muntazam texnik xizmat ko‘rsatish to‘plami Siemens mutaxassislari bilan birgalikda amalga oshiriladi, — deyiladi Gazprom bayonotida.

Xabarda ta’kidlanganidek, Siemens har 1000 soatda turbinaga texnik xizmat ko‘rsatishi kerak.

Rejalashtirilgan profilaktika ishlari 31-avgustdan 2-sentabrgacha amalga oshiriladi.

Avvalroq Yevropaga gaz yetkazib berish tarixiy eng past darajaga yetishi mumkinligi haqida xabar berilgandi.