Россия июль ойида кетма-кет учинчи ой Хитойга нефть етказиб бериш бўйича етакчиликни сақлаб қолди. Бу ҳақда Reuters хабар бермоқда.
Ўтган ойда Хитойга Россия нефтининг импорти 7,15 млн тоннани ташкил этди — кунига тахминан 1,68 млн баррель. Бу ўтган йилга нисбатан 7,6 фоизга кўп.
Май ойидаги рекордни (кунига тахминан 1,98 млн баррель ва ойига деярли 8,42 млн тонна) июль ойида янгилаб бўлмади. Июнь ойида Хитойда Россия нефтининг импорти 7,29 млн тоннани ташкил этди.
Саудия Арабистони Хитойга нефть етказиб бериш бўйича иккинчи ўринда қолмоқда — июль ойида Пекинга 6,56 млн тонна сотган, Ироқ эса 3,63 млн тонна билан учинчи ўринни эгаллаган.
Ғарб давлатлари Россияга қарши санкциялар киритгач, Москва Осиёга нефть етказиб беришни оширди.
Май ойида Kpler таҳлилчиларининг ҳисоб-китобларига кўра, Осиё давлатлари Россиядан нефть харид қилиш бўйича биринчи марта Европани ортда қолдирган.
Бош вазир ўринбосари Александр Новак Россиянинг янги харидорлари борлигини, Осиё—Тинч океани минтақаси мамлакатларига етказиб бериш ҳажми ошганини айтди.
Июль ойи охирида америкалик сенатор Марко Рубио Россиянинг Хитойга нефть етказиб беришига қарши санкциялар тўғрисидаги қонун лойиҳасини тақдим этди.
Изоҳ (0)