Ўзбекистонда 20 август – тадбиркорлар куни. Шу муносабат билан Тошкент шаҳрида бир гуруҳ тадбиркорларни тақдирлаш маросими бўлиб ўтди, дея хабар бермоқда «Дарё» мухбири.
Ўзбекистон президентининг «Фаол тадбиркор» кўкрак нишонини таъсис этиш тўғрисида»ги қарори ва «Фаол тадбиркор» кўкрак нишони билан тақдирлаш тўғрисида»ги фармойишига асосан, 71 нафар тадбиркор мазкур нишонлар билан тақдирланди.
Тадбирни Инвестициялар ва ташқи савдо вазири Жамшид Хўжаев очиб берди.
Бу йилги президент билан тадбиркорлар мулоқоти 22 август куни ўтказилади. Мазкур тадбирга тайёргалик кўриш жараёнида тадбиркорлардан жами 12 мингдан ортиқ мурожаатлар келиб тушди. Уларнинг асосий йўналишлари бизнесни молиялаштириш, субсидия, солиқ ва ер ажратиш масалаларида. Ушбу мурожаатларнинг 11 минг 450 таси индивидуал характерга эга бўлиб, шундан 9 минг 390 таси ижобий ҳал қилинди. Қолганларига тезкорлик билан ечим топиш ишлари олиб бориляпти.
Бош вазир ўринбосари, Иқтисодий тараққиёт ва камбағалликни қисқартириш вазири Жамшид Қўчқоров тадбиркорларга ўз табрикларини айтди.
Электрни ҳам, телефонни ҳам, барча муҳим нарсаларни тадбиркорлар кашф қилган, олдинга қараб фикрловчилар ўйлаб топган. Ўзбекистонда 20 август –тадбиркорлар байрами деб эълон қилинган. Ўйлаймакни, ҳали тадбиркорлар бир-бирини табриклаб, «откритка»лар ёзади. Бу кун чинакам байрам қилинади.
Тадбирда Тошкент шаҳар ҳокими Жаҳонгир Ортиқхўжаев Ўзбекистонда тадбиркорларни буюк келажак кутаётганини айтди.
Ўзбекистонда тадбиркорнинг келажаги албатта буюк. Албатта, ривожланади. Бунга президентимиз барча шароитларни яратиб берганлар. Бизлар бундай имкониятларнинг қадрига етишимиз, эъзозлашимиз керак. Кечаси уйга бориб тинч ухлайдиган, бирорта текширувдан қўрқмайдиган, ‘ҳали маҳсулотларимни дунё кўради‘, деб баралла айтадиган кунлар келди. Тошкент шаҳар ҳокимлиги тадбиркорларни ҳар доим қўллаб-қувватлашга тайёр.
Тадбиркор Мухлиса Акромова ҳам иштирокчиларга табрик билдирди.
Биз тадбиркорларга берилаётган бундай катта эътибордан мамнунмиз. Очиғи, 20 август куни сизларда тадбиркорлар учун катта байрам экан деб чет эллик ҳамкорларизмиз ҳайрон бўлишяпти. Бу албатта, инсонга ғурур бағишлайди. Ҳозирда бизнинг корхонамизда 500 нафар ишчи ишлайди. Яна бир тадбиркор айтяптики, унинг корхонасида 300 нафар ходим ишларкан. Уларнинг ортларида қанча аёллар бор.
Тадбиркор Насриддин Рашидовнинг айтишича, олдинлари тадбиркорлар Ўзбекистонда жони хатардалигини ҳис қилиб, қўрқиб яшаган.
Бугунги кунларни жуда интиқиб кутганмиз. Ҳаётимизда бундай яхши шароитлар яратиб берилади деб ўйламаганмиз. Авваллари биз тадбирорлар эртаю кеч қўрқиб яшаганмиз. Уйдан офисгача боргунча ҳам қўрақар эдик. Бугун эса эркинмиз. Ичимиздаги дардларимизни мутасадди раҳбарларга қўрқмасдан айта оляпмиз, зарур масалаларни муҳокома қилмоқдамиз.
Изоҳ (0)