Marg‘ilon shahrida 60 sotix yerni 48 ming dollarga sotmoqchi bo‘lgan fuqaro ushlandi. Bu haqda “Daryo”ga viloyat IIB axborot xizmati ma’lum qildi.
Qayd etilishicha, 2022-yil 18-avgust kuni Farg‘ona viloyat IIB boshlig‘i nomiga fuqaro A.O‘. ariza bilan murojaat qilib, Marg‘ilon shahrida joylashgan, bog‘dorchilik uyushmasiga qarashli 60 sotix yerni V.G‘. ismli shaxs 48 ming dollarga sotishga urinayotganini ma’lum qilgan. Va unga nisbatan qonuniy chora ko‘rishni so‘ragan.
Mazkur ariza yuzasidan shu kuni Farg‘ona viloyati IIB JQB, Korrupsiya va iqtisodiy jinoyatlarga qarshi kurashish bo‘limi xodimlari tomonidan o‘tkazilgan tezkor tadbir davomida, V.G‘. Farg‘ona tumani “Satkak” mahallasi hududida arizachi A.O‘.dan kimyoviy ishlov berilgan 20 ming dollarni olgan vaqtida daliliy ashyolar bilan ushlangan.
Mazkur holat yuzasidan Farg‘ona viloyati IIB jinoyat qidiruv bo‘limi tomonidan tergovga qadar tekshiruv harakatlari olib borilmoqda.
Izoh (0)