Марғилон шаҳрида 60 сотих ерни 48 минг долларга сотмоқчи бўлган фуқаро ушланди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, 2022 йил 18 август куни Фарғона вилоят ИИБ бошлиғи номига фуқаро А.Ў. ариза билан мурожаат қилиб, Марғилон шаҳрида жойлашган, боғдорчилик уюшмасига қарашли 60 сотих ерни B.Ғ. исмли шахс 48 минг долларга сотишга уринаётганини маълум қилган. Ва унга нисбатан қонуний чора кўришни сўраган.
Мазкур ариза юзасидан шу куни Фарғона вилояти ИИБ ЖҚБ, Коррупция ва иқтисодий жиноятларга қарши курашиш бўлими ходимлари томонидан ўтказилган тезкор тадбир давомида, B.Ғ. Фарғона тумани «Саткак» маҳалласи ҳудудида аризачи А.Ў.дан кимёвий ишлов берилган 20 минг долларни олган вақтида далилий ашёлар билан ушланган.
Мазкур ҳолат юзасидан Фарғона вилояти ИИБ жиноят қидирув бўлими томонидан терговга қадар текширув ҳаракатлари олиб борилмоқда.
Изоҳ (0)