Uzbekistan Airways’ни хусусийлаштириш стратегиясини ишлаб чиқиш учун профессионал консалтинг компанияси танлаб олиниши юзасидан танлов эълон қилинди. Бу ҳақда Давлат активларини бошқариш агентлиги хабар бермоқда.
Маҳаллий ва хорижий талабгорлар тижорат таклифларини жорий йил 17 сентябрь куни соат 18:00 га қадар тақдим этиши керак.
Агар биргаликда қўшма тижорат таклифи тақдим этилса, жалб қилинган шерик-консултантнинг ҳам ишини мувофиқлаштириш учун масъул бўлган ва жавобгарликни зиммасига оладиган асосий консултант кўрсатилиши лозим.
Компания ҳақида маълумот
Компания «Ўзбекистон ҳаво йўллари» миллий авиакомпаниясининг хизмат кўрсатиш белгиси ва савдо белгисининг мутлақ ҳуқуқий вориси ҳисобланади.
Uzbekistan Airways — Ўзбекистон авиация ва халқаро қоидаларининг низомига мувофиқ ҳар қандай кўринишдаги енгил ва оғир юкларни, почталарни ҳамда йўловчиларни ҳаво кемалари орқали ташиш бўйича хизматларни тақдим этади.
Компания 50 нафардан ортиқ белгиланган йўналишларда, жумладан Европа, Осиё ва Шимолий Америка мамлакатларига мунтазам равишда рейсларни амалга оширади.
Авиакомпаниянинг ваколатхоналари 20 дан ортиқ дунё шаҳарларида фаолият кўрсатади.
Компаниянинг асосий фаолиятидан ташқари, унга тегишли Uzbekistan Airways Technics, Uzbekistan Helicopters, Ўқув-машғулот маркази ва Кетринг каби таркибий корхоналари мавжуд.
2021 йил якунига кўра компания 6,3 трлн сўм миқдоридаги соф тушумга, 53,7 млрд сўм миқдоридаги соф фойдага, шунингдек 4,2 трлн сўм миқдоридаги устав капиталига эга.
Изоҳ (0)