AQSH prezidenti Donald Tramp o‘zining Truth Social ijtimoiy tarmog‘idagi sahifasida rossiyalik hamkasbi Vladimir Putin bilan 15-avgust kuni Alyaskada uchrashishni rejalashtirganini ma’lum qildi.
“Men, Amerika Qo‘shma Shtatlari prezidenti va Rossiya Federatsiyasi prezidenti Vladimir Putin o‘rtasidagi uzoq kutilgan uchrashuv 2025-yil 15-avgust, juma kuni buyuk Alyaska shtatida bo‘lib o‘tadi. Qo‘shimcha tafsilotlar keyinroq ma’lum qilinadi”, deya yozdi Oq uy rahbari.
Ushbu uchrashuvni Rossiya prezidenti yordamchisi Yuriy Ushakov tasdiqlagan va Alyaskadagi Rossiya—AQSH sammitiga tayyorgarlik oson kechmasligi bildirgan.
“Shubhasiz, yaqin kunlarda Moskva va Vashington Alyaskadagi oliy darajadagi uchrashuvning amaliy va siyosiy jihatlarini juda faol va qizg‘in tarzda ishlab chiqishga kirishadi”, dedi u.
Uning so‘zlariga ko‘ra, uchrashuv joyi ikki davlatning geografik yaqinligi tufayli tanlangan.
“Rossiya va AQSH yaqin qo‘shnilar, bir-biri bilan chegaradosh. Bizning delegatsiyamiz shunchaki Bering bo‘g‘ozidan uchib o‘tishi va ikki davlat rahbarlarining bunday muhim va kutilgan sammiti aynan Alyaskada o‘tkazilishi mantiqan to‘g‘ri ko‘rinadi”, dedi Ushakov.
Alyaska shtati gubernatori Mayk Danlivi X ijtimoiy tarmog‘ida AQSH prezidenti Donald Tramp va Rossiya prezidenti Vladimir Putinning uchrashuvini qabul qilishga tayyor ekanini yozgan.
“Global ahamiyatga ega muhokamalar aynan shu yerda bo‘lib o‘tishi mantiqan to‘g‘ri. Asrlar davomida Alyaska mamlakatlar o‘rtasida ko‘prik vazifasini o‘tagan va bugungi kunda biz dunyoning eng muhim mintaqalaridan birida diplomatiya, savdo va xavfsizlik uchun darvoza bo‘lib qolmoqdamiz”, deya ta’kidladi u.
Ma’lum qilinishicha, Rossiya prezidenti Vladimir Putin Alyaskaga tashrif buyuradigan birinchi Rossiya rahbari bo‘ladi.
Qayd etilishicha, ilgari bu shtatga Rossiya yoki SSSRning birorta rahbari tashrif buyurmagan. Rossiya prezidenti so‘nggi marta AQSHga 2015-yilda tashrif buyurgan.
Izoh (0)