Ўзбекистонда IT соҳасида фаолият кўрсатаётган компаниялар сони 11,2 мингдан ошди. Бу ҳақда Давлат статистика қўмитаси хабар бермоқда.
Компаниялар ўсиш суръати ўтган йилнинг мос даврига нисбатан 7,5 фоизни ташкил этди.
Шунингдек, жорий йилнинг етти ойида ушбу соҳада 1 522 та корхоналар янги ташкил этилиб, уларнинг 1 514 таси кичик бизнес субъектлари ҳиссасига тўғри келди.
Энг кўп IT компаниялар ташкил этилган ҳудудлар орасида Тошкент шаҳри етакчилик қилмоқда — 652 та. Иккинчи ўринда 141 та корхона билан Самарқанд бораётган бўлса, Фарғона 109 та кўрсаткич билан учинчи ўринни эгаллаган.
Бундан ташқари, Ўзбекистонда чет эл IT компаниялари сони ҳам кескин ортмоқда.
2022 йил январь—июль ҳолатига кўра Ўзбекистонда янги ташкил этилган чет эл IT компаниялари сони 170 та бўлди.
Ўтган йилнинг шу даврида 57 та чет эл IT компаниялари ташкил қилинган эди.
2021 йил январь—июль ойларида Ўзбекистонда 369 та хорижий IT компаниялар фаолият кўрсатаётган эди. Жорий йилда бу кўрсаткич 550 тага етди.
2022 йил июль ойининг ўзида 20 та янги хорижий IT компаниялари фаолиятини бошлади. Июнь ойида эса 30 та шундай компания ташкил қилинган.
Изоҳ (0)