Ijtimoiy tarmoqlarda sog‘liqni saqlash tizimiga qarashli yirik davolash-profilaktika muassasalarida qurilish ishlari vazirlik rahbarlariga tegishli korxonalar tomonidan amalga oshirilayotganiga doir xabarlar tarqaldi. Sog‘liqni saqlash vazirligi ushbu holat yuzasidan munosabat bildirdi.
Unda ta’kidlanishicha, har yili mamlakat rahbarining “O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi tegishli qarorlari asosida investitsiya dasturi tasdiqlanadi.
Avvalo, obyektlarni loyihalashtirish va bunyod etish uchun loyiha va pudrat tashkilotlarini tanlash bilan bog‘liq tender (tanlov) savdolarini o‘tkazish belgilangan tartibda Qurilish vazirligining “Shaffof qurilish” elektron platformasi orqali amalga oshiriladi. Qolaversa, barcha qurilish ishlarining texnik nazorati Qoraqalpog‘iston va viloyatlar hokimliklari huzuridagi “Yagona buyurtmachi xizmati” injiniring kompaniyalari tomonidan olib boriladi.
Sog‘liqni saqlash vazirligi huzuridagi “Tibbiyot qurilish injiniring” davlat unitar korxonasi bugungi kunda 11 ta obyektga buyurtmachilik vazifasini bajarmoqda. Ushbu inshootlarning barchasi 2018—2021 yillarda qurilishi boshlangan va yildan yilga o‘tuvchi obyektlardir.
Shu ma’noda, ijtimoiy tarmoqlarda savol ostiga olinganidek, joriy yilning o‘tgan davrida “Tibbiyot qurilish injiniring” DUK tomonidan pudratchilarni tanlab olish bo‘yicha hech qanday tender (tanlov) savdolari o‘tkazilmagan. Sodda qilib aytganda, Sog‘liqni saqlash vazirligi tibbiyot muassasalarini qurish bo‘yicha loyiha va pudrat tashkilotlarini tanlash jarayonida bevosita ham, bilvosita ham ishtirok etmagan, — deyiladi munosabatda.
Izoh (0)