Ижтимоий тармоқларда соғлиқни сақлаш тизимига қарашли йирик даволаш-профилактика муассасаларида қурилиш ишлари вазирлик раҳбарларига тегишли корхоналар томонидан амалга оширилаётганига доир хабарлар тарқалди. Соғлиқни сақлаш вазирлиги ушбу ҳолат юзасидан муносабат билдирди.
Унда таъкидланишича, ҳар йили мамлакат раҳбарининг «Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги тегишли қарорлари асосида инвестиция дастури тасдиқланади.
Аввало, объектларни лойиҳалаштириш ва бунёд этиш учун лойиҳа ва пудрат ташкилотларини танлаш билан боғлиқ тендер (танлов) савдоларини ўтказиш белгиланган тартибда Қурилиш вазирлигининг «Шаффоф қурилиш» электрон платформаси орқали амалга оширилади. Қолаверса, барча қурилиш ишларининг техник назорати Қорақалпоғистон ва вилоятлар ҳокимликлари ҳузуридаги «Ягона буюртмачи хизмати» инжиниринг компаниялари томонидан олиб борилади.
Соғлиқни сақлаш вазирлиги ҳузуридаги «Тиббиёт қурилиш инжиниринг» давлат унитар корхонаси бугунги кунда 11 та объектга буюртмачилик вазифасини бажармоқда. Ушбу иншоотларнинг барчаси 2018—2021 йилларда қурилиши бошланган ва йилдан йилга ўтувчи объектлардир.
Шу маънода, ижтимоий тармоқларда савол остига олинганидек, жорий йилнинг ўтган даврида «Тиббиёт қурилиш инжиниринг» ДУК томонидан пудратчиларни танлаб олиш бўйича ҳеч қандай тендер (танлов) савдолари ўтказилмаган. Содда қилиб айтганда, Соғлиқни сақлаш вазирлиги тиббиёт муассасаларини қуриш бўйича лойиҳа ва пудрат ташкилотларини танлаш жараёнида бевосита ҳам, билвосита ҳам иштирок этмаган, — дейилади муносабатда.
Изоҳ (0)