O‘zbekiston Davlat ekologiya qo‘mitasi va Germaniya xalqaro hamkorlik jamiyati (GIZ) o‘rtasida iqlim o‘zgarishi bo‘yicha grant loyihasini amalga oshirish to‘g‘risida bitim imzolandi, deb xabar bermoqda Dunyo axborot agentligi.
Qayd etilishicha, Markaziy Osiyoda iqlim xavflarini boshqarish mintaqaviy loyihasi O‘zbekiston, Qozog‘iston, Tojikiston, Qirg‘iziston va Turkmanistonda amalga oshirilishi rejalashtirilgan.
Loyihaning umumiy qiymati 10 million yevroni tashkil etib, Germaniya Iqtisodiy hamkorlik va taraqqiyot federal vazirligi tomonidan moliyalashtiriladi hamda 2022—2026-yillarda implementatsiya qilinadi.
Loyiha Germaniya xalqaro hamkorlik jamiyatining (GIZ) “Yashil Markaziy Osiyo” mintaqaviy dasturi doirasida ishlab chiqilgan.
Tadbirda O‘zbekiston iqlim kun tartibining eng muhim jihati “yashil” iqtisodiyotga bosqichma-bosqich o‘tish ekanligi qayd etilgan. Ekspertlarning ta’kidlashicha, iqtisodiyotning energiya samaradorligini oshirish, uglevodorodlardan foydalanishni qisqartirish, qayta tiklanadigan energiya manbalari ulushini oshirish chora-tadbirlari amalga oshirilmoqda. Shunday qilib, 2030-yilga kelib energiya samaradorligi ko‘rsatkichi ikki baravar oshishi va yalpi ichki mahsulotning uglerod iste’molini pasayishi kutilmoqda.
Loyihaning hayotga tadbiq etilishi Davlat ekologiya qo‘mitasi hamda iqlim o‘zgarishi sohasidagi davlat idoralari mutaxassislari uchun kadrlar salohiyatini institutsional mustahkamlash va rivojlantirishni qo‘llab-quvvatlashga, Markaziy Osiyo mamlakatlari bilan iqlim kun tartibi bo‘yicha hamkorlikni yo‘lga qo‘yishga va o‘zaro transchegaraviy hamkorlikni mustahkamlashga yordam beradi. Shu bilan birga, xalqaro moliya institutlari va boshqa xalqaro tashkilotlarga moliyalashtirish uchun loyiha takliflarini ishlab chiqishda ko‘maklashadi.
Mavzuga doir:
Izoh (0)