“Manchester Yunayted” 30 yillik omadsiz natijasini takrorladi

“Manchester Yunayted” APLning 2-turi doirasida “Brentford”ga 0:4 hisobida imkoniyatni boy berdi.

Shu tariqa mankunianliklar chempionat startidagi 2 turda ham mag‘lubiyatga uchradi. Premyer Liganing 1-turida “qizil iblislar” “Brayton”ga 1:2 hisobida mag‘lub bo‘lgandi.

So‘nggi bor “Manchester Yunayted” APLning 1992/93-yilgi mavsumi startida 2 ta ketma-ket mag‘lubiyat qayd etgandi.

O‘shanda mankunianliklar yakunda Angliya chempioniga aylangandi. Aleks Fergyuson “Manchester Yunayted” murabbiyi sifatida ilk titulni qo‘lga kiritgandi.

Mankunianliklar Angliya Premyer Ligasining ketma-ket 7-mehmondagi o‘yinida g‘alaba qozona olmayapti. 2021/22-yilgi mavsum “Kristal Pelas” (0:1), “Brayton” (0:4), “Arsenal” (1:3), “Liverpul” (0:4), “Everton” (0:1) va “Manchester Siti”ga (1:4) imkoniyatni boy bergandi. “Qizil iblislar” so‘nggi bor 1936-yilda Angliya chempionatida ketma-ket 10 ta mehmondagi bahsda g‘alaba qozona olmagandi.