Germaniyaning Gyunsburg shahri yaqinidagi Legoland ko‘ngilochar bog‘ida sodir bo‘lgan baxtsiz hodisada 31 kishi jabrlandi. Bu haqda Sueddeutsche Zeitung’ga tayanib, Meduza xabar bermoqda.
Qurbonlar orasida 10 nafar bola, bir o‘smir va 20 nafar kattalar yoshli kishilar bor. Bir kishi jiddiy jarohat olgan, biroq politsiya ma’lumotlariga ko‘ra, uning hayotiga hech narsa xavf solmagan.
Baxtsiz hodisa Fire Dragon deb nomlangan attraksionda sodir bo‘lgan. Poyezdlardan biri yo‘lovchilar tushish joyiga yetib bormasdan turib, keskin to‘xtagan. Natijada uni orqadan kelayotgan poyezd urib yuborgan.
Dastlabki ma’lumotlarga ko‘ra, hodisaga texnik nosozlik sabab bo‘lgan bo‘lishi mumkin. Jabrlanganlarga yordam berish uchun uchta qutqaruv vertolyoti safarbar etilgan. Baxtsiz hodisadan keyin attraksion yopilgan.
Legoland 2002-yilda 60 dan ortiq attraksionlar bilan ochilgan. Olovli ajdaho ular orasida eng mashhurlaridan biridir. Undagi poyezdlar sekundiga 8 metrgacha (soatiga 29 kilometrgacha) tezlikda harakatlanadi.
Izoh (0)