AQSHning Ogayo shtati Sinsinnati shahridagi Federal qidiruv byurosi (FQB)ga bostirib kirishga uringan qurolli shaxs uni hibsga olmoqchi bo‘lgan paytda politsiya tomonidan otib o‘ldirilgan. Bu haqda CNN’ga tayanib, “Interfaks” xabar bermoqda.
Sinsinnati shtatidagi Federal qidiruv byurosiga ko‘ra, qurollangan shaxs, payshanba (11-avgust) kuni erta tongda mahalliy FQB idorasining tashrif buyuruvchilarni tekshirish hududiga yashirincha kirishga uringan, ammo signal chalinganidan keyin mashinada qochib ketgan.
Federal qidiruv byurosi, Ogayo shosse patrul xizmati va mahalliy huquq-tartibot idoralari gumonlanuvchini soatlab ta’qib qilgan. Natijada gumonlanuvchi mashinani to‘xtatgan.
Qayd etilishicha, muzokaralar natija bermagach, huquq-tartibot idoralari xodimlari gumonlanuvchini hibsga olishga uringan, biroq u politsiyaga qurol o‘qtagan.
Ma’lum qilinishicha, u AR-15 avtomati bilan qurollangan bo‘lgan.
Keyinroq, gumonlanuvchi shaxs Riki Shiffer ekanligi aniqlangan.
Hozirda FQB, Shifferning ijtimoiy tarmoqlarini va uning ekstremistik tashkilotlar bilan aloqasi bor-yo‘qligini aniqlamoqda.
Boshqa bir federal huquq-tartibot idorasi manbasining ta’kidlashiga ko‘ra, rasmiylar gumonlanuvchining 2021-yil 6-yanvardagi Kapitoliy hujumiga aloqador bo‘lgan guruhlarga bog‘liqligini tekshirmoqda.
Hodisa 9-avgust kuni AQSHning sobiq prezidenti Donald Tramp Mar-a-Lagoning mulkida tintuv o‘tkazilgandan so‘ng, shuningdek, tarmoqda paydo bo‘lgan FQBga nisbatan ko‘plab tahdidlardan keyin sodir bo‘lgan.
Mavzuga doir: Peru politsiyasi prezident qarorgohiga bostirib kirdi
Izoh (0)