Respublika tovar-xomashyo birjasida savdolarni ko‘paytirish, ularda Italiya kompaniyalari ishtirokini yo‘lga qo‘yish maqsadida mamlakatning Rimdagi elchixonasi tomonidan O‘zbekiston tovar-xomashyo birjasi raisi o‘rinbosari Nabixon Samatov va “Imagro Group” (Italiya) prezidenti Massimo Pollio ishtirokida videokonferensaloqa shaklida uchrashuv o‘tkazildi. Bu haqda “Dunyo” axborot agentligi xabar berdi.
Elchi Otabek Akbarov bugungi kunda mamlakatda iqtisodiyotni rivojlantirish, erkin bozor mexanizmlaridan samarali foydalanish, chet el ishbilarmon doiralari bilan hamkorlikni kengaytirish yo‘nalishida amalga oshirilayotgan sa’y-harakatlar haqida so‘zlab berdi.
Birjaning imkoniyatlari va istiqbollari, ayniqsa, yangi xorijiy mamlakatlar bozorlarini o‘zlashtirish, xorijiy ishbilarmon doiralari bilan hamkorlik qilish yo‘nalishidagi ishlarga alohida e’tibor qaratildi. Italiya kompaniyalari bilan aloqa o‘rnatish va o‘zaro manfaatli hamkorlikni rivojlantirishga qiziqish bildirildi.
Massimo Pollio so‘nggi yillarda Italiya va O‘zbekiston o‘rtasidagi hamkorlik turli yo‘nalishlarda, ayniqsa, savdo-iqtisodiy sohada jadal ravishda kengayib borayotganini ta’kidladi. Respublikaning keng iqtisodiy imkoniyatlari va salohiyatini inobatga olgan holda Italiya ishbilarmon doiralari vakillari tomonidan O‘zbekiston bilan savdo-iqtisodiy aloqalarni rivojlantirishga katta qiziqish bildirilayotgani qayd etildi.
Massimo Pollio, shuningdek, O‘zbekiston tovar-xomashyo birjasi bilan hamkorlik o‘rnatish, mamlakat savdo maydonchasini ochish va uzoq muddatli sheriklikni amalga oshirishga tayyorligini bildirdi. U, shuningdek, nafaqat Italiya, balki Ruminiya, Gretsiya, Fransiya va boshqa qo‘shni davlatlar kompaniyalari bilan ham savdo-sotiq munosabatlarini kengaytirishda ko‘maklashish imkoniyatiga ega ekanini ma’lum qildi.
Italiya kompaniyasi rahbari hamkorlikning dastlabki qadami sifatida “Imagro Group”ning Milan shahridagi ofisi qoshida O‘zbekiston tovar-xomashyo birjasi vakolatxonasini ochishni taklif qildi. Bundan tashqari, ikki tomonlama anglashuv memorandumini imzolashga tayyorligini aytdi. Uchrashuv yakunida tomonlar o‘zaro manfaatli hamkorlikni yo‘lga qo‘yish bo‘yicha qator kelishuvlarga erishdi.
Izoh (0)