O‘zbekistonda ikki yilda elektromobil importi qariyb 20 barobar oshdi

O‘zbekistonda 2022-yilning yanvar—iyul oylarida 1 314 ta elektromobil import qilingan. Bu haqda Davlat statistika qo‘mitasi xabar bermoqda. 

Elektromobil importi 2021-yilning mos davriga nisbatan 901 taga yoki 3,2 barobarga oshgan. 2020-yilning dastlabki yetti oyida O‘zbekistonga atigi 68 dona elektromobil keltirilgan edi. Ikki yilda import 19,3 barobarga ko‘paydi.

Joriy yil iyul oyining o‘zida bu ko‘rsatkich 189 tani tashil qildi. Yetti oy ichida 10 ta xorijiy davlatdan qiymati 40,1 mln dollarga teng bo‘lgan elektromobil import qilingan.

O‘zbekistonga eng ko‘p elektromobil yetkazib bergan davlatlar orasida Xitoy doimgidek yetakchilik qilmoqda. Yanvar—iyul oylarida ushbu davlatdan 1 155 ta elektromobil keltirilgan. 

Ikkinchi o‘rinni BAA (81) egallagan bo‘lsa, bu borada uchinchi etib Germaniya (29) ko‘rsatilgan.

Avvalroq Tesla elektromobillarini yetkazib berish ikki yil ichida birinchi marta qisqargan edi.