O‘zbekistonda yil boshidan beri sog‘lomlashtirish aksiyalarida 275 ming nafar bemorning salomatligi tiklandi. Bu haqda Sog‘liqni saqlash vazirligi matbuot xizmati xabar bermoqda.
Ta’kidlanishicha, vazirlik tomonidan 2022-yilning o‘tgan davrida mamlakatning 12 ta hududida sog‘lomlashtirish aksiyalari o‘tkazildi. Ularga vazirlik, respublika davolash-profilaktika muassasalarining 150 nafardan iborat yetakchi mutaxassislari jalb etildi.
“Mahallabay” tarzda o‘tkazilgan tekshiruvlarda 290 ming nafar ehtiyojmand aholi vakili chuqurlashtirilgan tibbiy ko‘rikdan o‘tkazildi. Natijada kasallik aniqlangan 275 ming nafar bemordan 210 ming nafari ambulator, 65 ming nafari statsionar sharoitda sog‘lomlashtirildi.
Bundan tashqari, murakkab operatsiyalarga muhtoj 15 ming nafar bemordan 3,2 ming nafarida hududlarning o‘zida yuqori texnologiyali jarrohlik amaliyotlari o‘tkazildi. Bularni oddiy xirurg-shifokorlar emas, respublika ixtisoslashtirilgan tibbiyot markazlarining yetuk mutaxassislari amalga oshirdi.
Jumladan, 960 nafar bemorda ko‘z sohasi bilan bog‘liq kasalliklar yuqori texnologik operatsiyalar yordamida bartaraf etildi. Og‘ir yurak-qon tomir xastaliklari bilan og‘rigan 650 nafar bemorda stentlash, shuntlash, sun’iy klapanlar o‘rnatish kabi jarrohlik amaliyotlari bajarildi.
Izoh (0)