Ўзбекистонда йил бошидан бери соғломлаштириш акцияларида 275 минг нафар беморнинг саломатлиги тикланди. Бу ҳақда Соғлиқни сақлаш вазирлиги матбуот хизмати хабар бермоқда.
Таъкидланишича, вазирлик томонидан 2022 йилнинг ўтган даврида мамлакатнинг 12 та ҳудудида соғломлаштириш акциялари ўтказилди. Уларга вазирлик, республика даволаш-профилактика муассасаларининг 150 нафардан иборат етакчи мутахассислари жалб этилди.
«Маҳаллабай» тарзда ўтказилган текширувларда 290 минг нафар эҳтиёжманд аҳоли вакили чуқурлаштирилган тиббий кўрикдан ўтказилди. Натижада касаллик аниқланган 275 минг нафар бемордан 210 минг нафари амбулатор, 65 минг нафари стационар шароитда соғломлаштирилди.
Бундан ташқари, мураккаб операцияларга муҳтож 15 минг нафар бемордан 3,2 минг нафарида ҳудудларнинг ўзида юқори технологияли жарроҳлик амалиётлари ўтказилди. Буларни оддий хирург-шифокорлар эмас, республика ихтисослаштирилган тиббиёт марказларининг етук мутахассислари амалга оширди.
Жумладан, 960 нафар беморда кўз соҳаси билан боғлиқ касалликлар юқори технологик операциялар ёрдамида бартараф этилди. Оғир юрак-қон томир хасталиклари билан оғриган 650 нафар беморда стентлаш, шунтлаш, сунъий клапанлар ўрнатиш каби жарроҳлик амалиётлари бажарилди.
Изоҳ (0)