Шавкат Мирзиёев Тошкент вилоятининг Бекобод шаҳрида металлургия тармоғи ходимлари ва тадбиркорлар билан учрашув ўтказмоқда, деб хабар бермоқда «Дарё» мухбири.
Президент 1940 йилларида ишга тушган Ўзбекистон металлургия комбинати узоқ йиллар Ўзбекистонда қора металлургия соҳасида ягона йирик корхона бўлиб келганини қайд этди.
«Сўнгги беш йилдаги ислоҳотларимиз натижасида 200 та янги корхона ташкил этилди ва 2021 йилнинг ўзида соҳада 16 триллион сўмлик маҳсулотлар ишлаб чиқарилди (2017 йилда 4 триллион сўм бўлган). Ушбу корхоналарда 25 мингдан зиёд аҳолимиз меҳнат қилмоқда. Соҳада темир ва темир маҳсулотлари ишлаб чиқариш 1,8 баробар ўсиб, 2 миллион тоннадан кўпайди. Келгусида эса, биргина ҳозир бориб кўрган Қуюв прокат мажмуасида йилига яна 1 миллион тонна пўлат листлари ишлаб чиқарилади. Мазкур лойиҳа ишга тушгач, комбинат қувватлари 2 бараварга ошади», — дейди давлат раҳбари.Шавкат Мирзиёевнинг айтишича, ўз вақтида «Меткомбинат» учун 800-900 минг тонна иккиламчи қора металлни қайта ишлаш етарли бўлган.
«Лекин, бугунги кунда иқтисодиётимизда қора металлга бўлган талаб 4 миллион тоннани ташкил этиб, унинг 50 фоизи импорт ҳисобидан қопланмоқда. Хусусан, қурилишда йилига 2,4 миллион тонна, муҳандислик тармоқлари учун – 680 минг тонна, саноатда – 970 минг тонна, шундан машинасозлик ва электротехникада – 450 минг тонна металл ишлатилади. Келгуси беш йилда металлга эҳтиёж машинасозликда – 1,4 баробарга, электротехникада – 2 баробарга ошиши кутилмоқда. Шунингдек, ҳудудларда 7 мингдан зиёд кўп қаватли уйлар қурилади», — дейди президент.Давлат раҳбарининг сўзларига кўра, 2026 йилга бориб иқтисодиёт эҳтиёжларини қондириш учун 6 миллион тоннага яқин металл керак бўлади. Жумладан, 2 млн тонна металл прокати, 550 минг тонна темир лист, 3 млн тонна металл буюмлар талаб этилади.
Изоҳ (0)