Иқтисодий жиноятларга қарши курашиш департаменти органлари томонидан спирт ва алкоголь маҳсулотларни ноқонуний ишлаб чиқариш ва сотишнинг олдини олиш борасида тезкор чоралар кўриб борилмоқда. Бу бўйича 2021 ва 2022 йилнинг ўтган даврида 198 та ҳуқуқбузарлик ҳолатлари аниқланиб, 81 та жиноят ва 117 та маъмурий ҳуқуқбузарликка оид ишлар қўзғатилди.
Бунда акциз маркасиз ёки қалбаки акциз маркали маҳсулотларни муомалага киритилиши ҳамда уларнинг хом ашё манбаларини аниқлашга алоҳида эътибор қаратиб келинмоқда. Алкоголь маҳсулотларини ноқонуний ишлаб чиқаришга ихтисослашган 19 та яширин цех фаолиятига барҳам берилди.
Ўтказилган тезкор тадбирлар ҳамда терговга қадар текширув ҳаракатлари натижасида яширин цехлар орқали қўлбола усулда ишлаб чиқарилган 47,2 минг литр этил спирти маҳсулотлари ва 90,7 минг дона қалбаки акциз маркали, сифатсиз алкоголли маҳсулотларининг ноқонуний муомалага киритилишининг олди олинди.
Ҳуқуқбузарлардан 2,4 миллиард сўмлик алкоголь ҳамда яширин ишлаб чиқариш ускуна ва анжомлари ашёвий далил сифатида олинди. Департамент органлари томонидан ушбу йўналишдаги профилактика ва тезкор-қидирув тадбирлари изчиллик билан давом эттирилмоқда.
Изоҳ (0)