Душанбе шаҳрида 10 август куни АҚШ Қуролли кучлари Марказий қўмондонлиги «Минтақавий ҳамкорлик—2022» ҳарбий машқларини бошлади. Бу ҳақда АҚШнинг Тожикистондаги элчихонаси хабар берди.
АҚШ элчиси Жон Марк Поммершейм Марказий қўмондонлик томонидан ташкил этилган ва Тожикистон мезбонлик қилаётган ушбу ҳарбий машғулотлар иштирокчиларини қутлаган. Машқлар 10—20 август кунлари бўлиб ўтади.
Таъкидланишича, минтақавий ҳамкорлик машқлари кўпмиллатли барқарорлик операцияларини мустаҳкамлаш, терроризмга қарши кураш, Марказий ва Жанубий Осиё давлатлари, АҚШ ва бошқа иштирокчи давлатлар ўртасида ҳамкорлик ва биргаликдаги имкониятларни ривожлантиришга қаратилган йиллик машғулот ҳисобланади.
АҚШ, Тожикистон, Қозоғистон, Қирғизистон, Мўғулистон, Покистон ва Ўзбекистон иштирокчилари олти кунлик қўмондонлик-штаб ўқув машқларида қатнашади. Тожикистон ва АҚШ Фахрободдаги ўқув марказида беш кунлик икки томонлама дала машғулотларини ҳам ўтказади. Жараён қуйидагиларга қаратилган:
- минтақавий хавфсизлик ва барқарорликни мустаҳкамлаш;
- оммавий қирғин қуроллари, терроризм элементлари ва гиёҳванд моддаларни ушлаб қолиш бўйича миллий имкониятлар ва мажбуриятларни ошириш;
- халқаро тинчликпарвар операцияларда ва ахборот алмашишда минтақавий мудофаа кучларини ривожлантиришга ёрдам бериш.
Изоҳ (0)