Finlyandiya poytaxtida sovet ittifoqi sovg‘a qilgan “Butun dunyoda tinchlik” yodgorligi olib tashlandi (video)

Finlyandiya poytaxti Xelsinkida sovet ittifoqi tomonidan sovg‘a qilingan “Butun dunyoda tinchlik” yodgorligi demontaj qilindi, deb yozadi Meduza.

Xakaniyemenrant ko‘chasida joylashgan haykal muzey omborxonasiga yuborildi. Uning keyingi taqdirini hukumat keyinroq hal qiladi.

Yodgorlikning demontaj qilinishi rasman ushbu ko‘cha va unga tutash maydondagi harakatni qayta tashkillashtirish bilan izohlanmoqda.

Haykal 1989-yilda SSSR hukumati tomonidan hadya etilgan, uning ochilishi esa 1990-yil yanvarida, Berlin devori qulaganidan keyin ko‘p o‘tmay bo‘lib o‘tgan edi. U ko‘p bora bahslarga sabab bo‘lgan va vandallar hujumlariga uchragan.

Finlyandiya odatda Rossiya bilan yaqin aloqalarni saqlab kelgan, ammo Ukrainada urush boshlanganidan keyin bu aloqalar keskin yomonlashdi. Ijtimoiy so‘rovlar ma’lumotlariga ko‘ra, hozir Finlyandiya aholisining yarmidan ko‘pi rossiyaliklarga viza berish taqiqlanishini yoqlab chiqmoqda. Bahorda mamlakat NATOga a’zo bo‘lish uchun ariza berdi, u hatto sovuq urush davrida ham bunga intilmagan edi.

Urush boshlanganidan keyin Boltiq mamlakatlarida ham sovet davri haykallari yoppasiga demontaj qilinmoqda.