Latviya Rossiya gazi importini qayta tikladi, deb yozadi Meduza Latviyaning tabiiy gazni tashib keltirish va saqlash bo‘yicha operatori Conexus Baltic Grid’ga tayanib.
Gaz Latviyaga “Valday — Pskov — Riga” gaz quvuri bilan Estoniyadagi “Luxamaa” gaz o‘lchash stansiyasi orqali kirib kelmoqda.
Rossiyadan Latviyaga gaz yetkazib berish 5-avgust kuni qayta boshlangan, deb aniqlik kiritdi “TASS” Yevropa gaz transporti tizimlari operatori ma’lumotlariga tayanib.
29-iyul kuni Latviya bahorda to‘xtatilgan Rossiya gazi xaridi qayta boshlanganini e’lon qilgandi. Shu bilan birga, Latvijas gaze operatori qayd etishicha, yonilg‘i bevosita “Gazprom”dan emas, vositachilar orqali sotib olinmoqda, uning uchun to‘lov esa Rossiya rublida emas, balki yevroda amalga oshirilmoqda.
30-iyul kuni “Gazprom” Latviyaga gaz yetkazib berishni “gazni tanlab olish shartlari buzilishi” tufayli to‘xtatdi. “Gazprom” aynan qanday qoidabuzarliklar haqida gap borayotganiga aniqlik kiritmadi.
Latviya hukumati 2023-yildan boshlab Rossiya tabiiy gazidan butunlay voz kechmoqchi.
Izoh (0)