Hindistonning Chennai shahrida Butunjahon shaxmat Olimpiadasi davom etmoqda.
Ortda qolgan 5 turdan keyin O‘zbekiston erkaklar terma jamoasi uchinchi o‘rinda bormoqda. Hindiston-2 jamoasi peshqadam bo‘lib turibdi, Armaniston keyingi pog‘onadan joy olgan.
3-avgust kuni o‘zbekistonliklar musobaqaga ikkinchi raqamda saralangan va ayni vaqtda 4-pog‘onada borayotgan Hindiston terma jamoasiga qarshi bahs olib boradi.
O‘zbekiston ortda qolgan turlarda Nepal (4:0), Farer orollari (4:0), Sloveniya (3:1) va Slovakiyani (4:0) yutgan bo‘lsa, AQSh bilan durang (2:2) natija qayd etdi.
O‘zbekiston ayollar terma jamoasi Gana (4:0), Zambiya (4:0), Dominikanni (3:1) mag‘lubiyatga uchratdi. AQSh (1:3) va Vyetnamga (0,5:3,5) imkoniyat boy berildi. O‘zbekistonlik qizlar 3-avgust kuni Shotlandiya terma jamoasiga qarshi bahs olib boradi.
Butunjahon shaxmat Olimpiadasida O‘zbekiston erkaklar terma jamoasi sharafini Nodirbek Abdusattorov, Javohir Sindorov, Nodirbek Yoqubboyev, Jahongir Vohidov va Shamsiddin Vohidov himoya qilmoqda. Ayollar terma jamoasiga esa Nilufar Yoqubboyeva, Umida Omonova, Maftuna Bobomurodova, Afruza Hamdamova va Marjona Malikova jalb qilingan.
Izoh (0)