Шахмат Олимпиадаси. Ўзбекистон эркаклар терма жамоаси мезбонлар билан дуранг ўйнади, қизларда йирик ғалаба

Ҳиндистоннинг Ченнаи шаҳри мезбонлигида ўтаётган Бутунжаҳон шахмат Олимпиадасининг 3 август кунги баҳслари якунланди.

Ўзбекистон эркаклар терма жамоаси 6-тур доирасида мусобақага иккинчи рақамда сараланган Ҳиндистонга қарши дона сурган бўлса, аёллар терма жамоаси Шотландия билан баҳс юритди.

Ҳиндистонга қарши кечган баҳсда 2:2 ҳисоби қайд этилди. Шамсиддин Воҳидов ўз партиясини ютган бўлса, Нодирбек Абдусаттаров кучли рақибига имкониятни бой бериб, мусобақадаги илк мағлубиятни қабул қилиб олди. Жавоҳир Синдоров ва Нодирбек Ёқуббоев эса дурангга эришди.

Аёллар терма жамоаси аъзолари Шотландия устидан 4:0 ҳисобидаги ғалабани қўлга киритди. Умида Омонова, Мафтуна Бобомуродова, Афруза Ҳамдамова ва Маржона Маликова рақиблари устидан ғалабага эришди.

6-турдан кейин Ўзбекистон эркаклар терма жамоаси умумий рейтингда 4-ўринда бормоқда, қизлар эса 37-поғонадан жой олган. Эслатиб ўтамиз, эркаклар терма жамоаси мусобақага 14-рақамда, аёллар эса 46-рақамда сараланган.

5 август куни 7-тур баҳслари бўлиб ўтади. Унда эркаклар терма жамоаси Перу билан ўйнаса, аёллар Сербияга қарши дона суради.

Мавзуга доир: Ўзбекистон эркаклар терма жамоаси Бутунжаҳон шахмат Олимпиадасида 5-турдан кейин кучли учликда бормоқда